مظفرآباد (این این آئی)وزیر اعظم آزادجموں وکشمیر راجہ محمد فاروق حیدرخان نے کہا ہے کہ کرونا سے بچائو کیلئے حفاظتی تدابیر پر عمل کرنا ہر شہری کا فرض ہے ۔جتنی احتیاط کریں گے اتنا ہی محفوظ رہیں گے۔پڑھے لکھے طبقے کی ذمہ داری ہے کہ کرونا سے بچائو کیلئے شعور اجاگر کریں ۔ عوام اگر تعاون نہیں کرینگے تو حکومت کو سخت فیصلے کرنا پڑیں گے۔ہمیں کرونا سے بچائو کرتے ہوئے زندہ رہنا سیکھنا ہے ۔
کرونا کا ابھی تک کوئی علاج دریافت نہیں ہوا، اگر شہریوں نے سنجیدگی نہ دکھائی تو اس وباء کو کنٹرول کرنا بہت مشکل ہو جائے گا۔حکومت آزاد کشمیر نے محدود وسائل کے باوجوداس کے پھیلائو کو روکنے کیلئے اقدامات اٹھائے لیکن لاک ڈائون میں نرمی کے بعد عوام کی جانب سے بے احتیاطی کی گئی جس کی وجہ سے کیسز میں تیزی سے اضافہ ہوا۔اپنے ایک بیان میں وزیر اعظم آزادجموں وکشمیر نے کہا کہ موجودہ حالات میں سب کو احتیاط اورذمہ داری کامظاہرہ کرناہوگا- عوام سے ایک بار پھر اپیل ہے کہ وہ حفاظتی ایس او پی پر عمل کریں – حکومت آزادجموں وکشمیر نے محدود وسائل کے باوجود بروقت لاک ڈائون کا فیصلہ کیا جس کی وجہ سے کرونا کا پھیلائو کنٹرول میں رہا ۔ لاک ڈائون کے دوران دہاڑی دار طبقہ کو ریلیف فراہم کرنے کیلئے بھی اقداما ت اٹھائے ۔ دنیا میں کسی ملک کے پاس اتنے وسائل نہیں کہ وہ مسلسل لاک ڈائون کر نظام چلا سکے ۔ عوام کی مشکلات کے پیش نظر لاک ڈائون میں نرمی دی لیکن نرمی کے بعدکرونا کے کیسز میں تیزی سے اضافہ ہو نا شروع ہو گیا ہے جوکہ انتہائی تشویشناک ہے ۔ عوام اگر حکومتی احکامات کی پاسداری نہیں کرینگے توکرونا وائرس کے پھیلائو کو کنٹرول کرنا بہت مشکل ہو جائے گا۔ انہوںنے کہاکہ گزشتہ چند دنوں میں کرونا کیسز میں غیر معمولی اضافہ ہوا ہے اور صورتحال مشکل ہو سکتی ہے ۔ عوام سماجی رابطوں کو محدود رکھیں سماجی فاصلہ کو ہر صورت یقینی بنائیں۔
