اسلام آباد(مانیٹرنگ ڈیسک)نجی ٹی و ی پروگرا م میں گفتگو کرتے ہوئے وبائی امراض کے ماہر ڈاکٹر طاہر شمسی نے انکشاف کیا ہے کہ لاہور کے ہر محلے ، ہر گھر میں کرونا کا مریض ہے، جو رپورٹ ابھی پنجاب حکومت کو دی گئی ہے کہ جس میں کہا گیا ہے کہ 6لاکھ افراد متاثر ہیں ، تو یہ تعداد 6لاکھ سے کہیں زیادہ ہے۔

انہوں نے کہا کہ کرونا سے صحت یاب مریض پلازمہ عطیہ کریں ، ہمیں 10ہزار ڈونرز درکار ہیں ،ایک صحت مند شخص اگر اپنا پلازمہ ڈونیٹ کریگاتو اس کی بدولت 2مریض صحت یاب ہو سکیں گے ۔دریں اثنا چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل محمد افضل سے وبائی امراض کے ماہر معروف ڈاکٹر طاہر شمسی سے ملاقات کی ہے۔جس میں پلازمہ تھراپی کے ذریعے کورونا مریضوں کے علاج کے حوالے سے تبادلہ خیال کیا گیا۔ملاقات میں پلازمہ تھراپی کے ذریعے علاج کی سہولیات کو وسیع کرنے کا فیصلہ کیا گیا ہے۔چیئرمین این ڈی ایم اے نے تمام ضروری سہولیات مہیا کرنے کی یقین دہانی کرواتے ہوئے کہا کہ رضا کارانہ طور پر پلازمہ عطیہ کرنے والوں کے لئے خصوصی ہیلپ لائن قائم کر رہے ہیں جبکہ پلازمہ عطیہ کرنے والے افراد کی معلومات کو صیغہ راز میں رکھا جائے گا۔