اسلام آباد(این این آئی) سپریم کورٹ نے پشاور ہائیکورٹ کو ملٹری کورٹس سے سزا یافتہ ملزمان کو ضمانت پر رہا کرنے سے روک دیا۔ بدھ کو ملٹری کورٹ سے سزا یافتہ قیدیوں کی پشاور ہائی کورٹ سے ضمانت معاملے پر وفاق کی درخواست پر سماعت جسٹس مشیر عالم اور جسٹس قاضی امین پر مشتمل بینچ نے کی۔دور ان سماعت اٹارنی جنرل نے کہاکہ یہ غیر معمولی مقدمات ہیں ان میں ضمانتوں سے

ناقابل تلافی نقصان ہوگا، متعلقہ افراد کی گرفتاریوں کے لیے کئی لوگوں نے جان کا نذرانہ پیش کیا۔ جسٹس مشیر عالم نے کہاکہ اگر سپریم کورٹ پشاور ہائیکورٹ کو ضمانت دینے سے روکتی ہے تو غلط روایت ہوگی، ایسے تو ہر آدمی ہائیکورٹ کے خلاف سپریم کورٹ آ جائے گا۔ بعد ازاں سپریم کورٹ نے پشاور ہائیکورٹ کو ملٹری کورٹس سے سزا یافتہ ملزمان کو ضمانت پر رہا کرنے سے روک دیا ۔ سپریم کورٹ نے کہاکہ پشاور ہائیکورٹ ضمانت کے عبوری احکامات بھی جاری نہ کرے، پشاور ہائی کورٹ مقدمات کی میرٹ پر سماعت جاری رکھے۔عدالت نے فریقین کو نوٹس جاری کر کے سماعت آئندہ پیر تک ملتوی کردی۔