لاڑکانہ(این این آئی) وزیر اعلی سندھ کے احکامات کے باوجود شہر اور گردونواح میں کاروبار کھل نہ سکا، وزیراعلیٰ سندھ سید مراد علی شاہ کی جانب سے لاک ڈائون میں نرمی اور چھوٹے دکانداروں کو کاروبار کھولنے کی اجازت ملنے کے بعد لاک ڈائون کے 50 ویں روز لاڑکانہ کے چھوٹے دکانداروں کی جانب سے صبح کے وقت دکان کھولنے کے دوران انتظامیہ اور پولیس کی جانب سے کھلی ہوئی

تمام دکانیں بند کروادیں جس کے باعث چھوٹے دکاندار بغیر کاروبار کیے اپنے گھروں کو روانہ ہوگئے جبکہ سرہیہ پدھر اور صدیقی بازار کے چھوٹے دکانداروں نے دکان بند کروانے کے خلاف احتجاجی مظاہرہ کرتے ہوئے دکان کھولنے کا مطالبہ کیا، دوسری جانب لاک ڈائون کے دوران شہر کے بڑے شاپبنگ مال، ریسٹورینٹ اور دیگر بڑی کاروبار مراکز مکمل طور بند رہے جبکہ پولیس کی جانب سے سیکیورٹی کے انتہائی سخت انتظامات کرتے ہوئے شہر کے تمام روڈوں کے دونوں اطراف کو کھول دیا گیا جس کے باعث ٹریفک جام رہی اور شہریوں کو شدید گرمی میں بھی مشکلات کا سامنا کرنا پڑا، دوسری جانب لاڑکانہ کی تحصیل رتودیرو میں صبح سویر تجارتی مارکیٹس آنے والے تاجروں کو پولیس نے دوکانیں کھولنے سے روک دیا جبکہ پولیس نے کھلی ہوئی دوکانیں بھی بند کروا دیں جہاں تاجروں کا ایس ڈی ایم آفیس کے سامنے دھرنا دے کر شدید نعرے بازی بھی کی۔