لاہور(این این آئی) پاکستان کی کوششوں سے بھارت میں پھنسے ہوئے 193 پاکستانی آج( منگل )کوواہگہ کے راستے وطن واپس پہنچیں گے ۔بتایا گیا ہے کہ کورونا وائرس کی وجہ سے لاک ڈائون اور سرحدیں بند ہونے کی وجہ سے بھارت جانے والے پاکستان وہیں محصور ہو گئے تھے ۔پاکستان کے سفارتخانے کی کوششوں کے بعد بھارت نے ان پاکستانیوں کو اٹاری، واہگہ کے
راستے واپس بھیجنے کے انتظامات مکمل کر لئے ہیں۔ 193پاکستانیوں کی واپسی کے لئے منگل کے روز اٹاری، واہگہ بارڈر کو خصوصی طور پر کھولا جائے گا۔ واپس آنے والے پاکستانیوں کی سکریننگ کی جائے گی جس کے بعد انہیں قرنطینہ میں رکھا جائے گا ۔ یاد رہے کہ اس سے قبل بھی بھارت سے واپس آنے والے پاکستانیوں میں کورونا وائرس کی تشخیص ہوچکی ہے۔
