اسلام آباد(این این آئی)معاون خصوصی عثمان ڈار نے وزیراعظم کی ہدایت پر قائم ٹائیگر فورس ٹیسٹ رن مکمل بدھ سے آپریشنل ہونے کااعلان کردیا ہے ۔ابتدائی طور پر سیالکوٹ میں نوجوانوں کو ذمہ داریاں سونپی گئیں،نوجوانوں کو مساجد اور یوٹیلیٹی اسٹورز کے باہر تعینات کیا گیا۔

رضاکاروں پر مشتمل فورس کو ضلعی انتظامیہ اور مقامی پولیس کا تعاون بھی حاصل ہے ،مساجد اور یوٹیلیٹی اسٹورز میں سوشل ڈسٹنسنگ اور حکومتی گائیڈ لائینز کو یقینی بنایا جائیگا ،یوٹیلیٹی اسٹورز میں مطلوبہ سامان میسر نہ ہونے پر ضلعی انتظامیہ کو شکایت کی جا سکے گی۔ عثمان ڈار نے کہاکہ ٹائیگر فورس کی سافٹ لانچنگ کا تجربہ کامیاب رہا،عوام کا تعاون اور رد عمل قابل ستائش ہے۔ انہوںنے کہاکہ نوجوانوں نے قومی جذبے کے تحت محنت اور لگن سے ذمہ داری پوری کی، سیالکوٹ سے ٹائیگر فورس کو باضابطہ آپریشنل کر رہے ہیں،ومرحلہ وار ملک بھر کے نوجوانوں کو مکمل طور پر متحرک کر دیں گے۔ انہوں نے کہاکہ سیالکوٹ سے 20 ہزار سے زائد نوجوان ٹائیگر فورس کا حصہ بنے ہیں،طالب علم،سوشل ورکرز،اساتذہ،انجینئرز اور ڈاکرز فورس میں شامل ہوئے ہیں۔ انہوںنے کہاکہ صحافی،قانون دان،میڈیکل ورکرز اور این جی اوز سے وابستہ افراد نے بھی رجسٹریشن کروائی۔