اسلام آباد (نیوز ڈیسک) وزیر اعظم عمران خان کی احساس ٹیلی تھون کی لائیو نشریات میں پاکستان سمیت پوری دنیا سے لوگ شریک ہوئے اور دل کھول کر عطیات دیے۔ نشریات کے اختتام پر معروف مذہبی سکالر مولانا طارق جمیل نے عوام سے اس وبا سے احتیاط برتنے اور خدا کے حضور توبہ کرنے کی تلقین کی، انہوں نے اللہ تعالیٰ کے حضور گڑگڑا کر اس عذاب سے چھٹکارے کی بھی خصوصی دعا کی۔
مولانا طارق جمیل نے اپنی دعا میں کہا کہ عمران خان کو اُجڑا چمن ملا کہاں تک آبادکرے گا، بارش ہوئی آپ ﷺنے حضرت بلال ؓ سے کہا اذان میں کہو لوگ گھر میں نماز پڑھیں، وہ تو صرف کیچڑ تھا یہاں تو زندگی موت کا معاملہ ہے، اینکرز بیٹھے ہیں وزیر اعظم بیٹھے ہیں ہم کتنا جھوٹ بولتے ہیں،میں ہاتھ باندھ کر معافی چاہتا ہوں، ایک بڑے میڈیا مالک کو نصیحت کی جھوٹ نہ بولو اس نے کہا چینل بند ہو سکتا ہے جھوٹ بند نہیں ہو سکتا۔ ہم کرونا سے لڑ نہیں سکتے، یہ نہیں کہنا چاہیے، ہمیں دعا کرنی ہے، اللہ کی مدد مانگنی ہے۔صرف ہمارا میڈیا جھوٹا نہیں بلکہ پوری دنیا کا میڈیا جھوٹا ہے۔ نبی کریم ؐ نے فرمایا کہ جب کوئی شخص جھوٹ بولتا ہے تو جھوٹ کی بو سے فرشتے دور بھاگ جاتے ہیں۔ سچ بولنا چاہے جان چلی جائے، دھوکہ نہ دینا، مسلمان کبھی کسی کو دھوکہ نہیں دیتا، اپنے اخلاق اونچے کرنا۔ میری بیٹیوں کے لباس مختصر کون کروا رہا ہے، جب مسلمان کی بیٹی بے حیائی کی طرف چل پڑے اور نوجوان بے حیائی کی طرف چل پڑیں، سب سے زیادہ عذاب قوم لوط پر آئے۔ نبی اکرمؐ نے کہا ہے کہ حیا والے بنو۔ مجھے عمران خان اس لئے پسند ہے کہ اس نے مجھے بلایا اور کہا کہ میں کیا ایسا کروں میری یوتھ اللہ کے نبی ؐ کے ساتھ جڑے، انہوں نے کہا کہ عمران خان نے کہا کہ میری قوم اپنے نبی کے ساتھ کیسے جڑ جائے۔آپ مجھے بتائیں۔ مولانا طارق جمیل نے انتہائی رقت آمیز دعا کروائی۔ انہوں نے کہا کہ میری قوم بددیانتی،
جھوٹ اور بے حیائی چھوڑ دے۔ نبی اکرم ؐ نے کہا کہ رزق حلال کھاؤ۔ پوری قوم کو کہتا ہوں کہ ساری قوم دو نفل اپنے اپنے گھروں میں پڑھے۔ پھر سب اللہ کے سامنے ہاتھ جوڑ کر معافی مانگیں۔ روزانہ سمندر کہتا ہے مجھے اجازت دیں میں ان پر چڑھ جاؤں، زمین کہتی ہے کہ مجھے اجازت دیں میں ان کو نگل جاؤں، فرشتے اللہ سے کہتے ہیں کہ ہمیں اجازت دیں ہم ان کا صفایا کر دیں، اللہ کہتے ہیں کہ جاؤ یہ میرا بندہ ہے میں جانوں میرا بندہ جانے۔
