مظفرآباد(این این آئی) دارالحکومت مظفرآباد میں غیر قانونی طور پر کورونا وائرس کے ٹیسٹ کرنے پر چغتائی لیب کو بند کردیا گیا۔ بوگس ٹیسٹوں سے متعلق ریکارڈ ضبط‘انچارچ سمیت4 افراد پولیس تحویل میں دیدئیے گئے۔ بااثر افراد معاملہ کو دبانے کیلئے ہاتھ پاؤں مارنا شروع ہو گئے۔

گزشتہ روز شکایات ملنے پر اے ڈی ایچ او ڈاکٹر عامر شہزاد نے پولیس نفری کے ہمراہ چغتائی لیب کا معائنہ کیا تو وہاں پر بدوں اجازت مجاز اتھارٹی سیکرٹری صحت عامہ کورونا کے ٹیسٹوں کا سلسلہ جاری تھا۔ لیب میں 14حاملہ خواتین جبکہ دو مردوں کل 16کورونا وائرس کے ٹیسٹ کئے گئے تھے۔ ڈاکٹر عامر شہزاد نے جعلی‘بوگس ٹیسٹوں سے متعلق ریکارڈ ضبط کرتے ہوئے لیبارٹری کو بند کرادیا ہے جبکہ انچارج امجد چیمہ سمیت سٹاف کے دیگر تین افراد کو پولیس کی تحویل میں دیدیا ہے۔ ان ٹیسٹوں کے حوالے سے نہ تو لیبارٹری کو کوئی اجازت تھی اور نہ ہی کسی مستند ڈاکٹر نے انھیں تجویز کیاتھا۔ ٹیسٹوں کیلئے نمونے حاصل کرنے کیلئے کسی قسم کی حفاظتی تدابیر بھی نہیں اپنائی گئی تھیں۔ جس سے کورونا وائرس پھیلنے کا خطرہ بھی موجود تھا۔ ادھر بااثر افراد نے معاملہ رفع دفع کرنے کرنے کیلئے انتظامیہ پر دباؤ بڑھا رہے ہیں۔ عوامی حلقوں نے وزیراعظم‘چیف سیکرٹری‘ سیکرٹری ہیلتھ اور ڈی صحت سے اس حوالے سے سخت کارروائی کا مطالبہ کیا ہے۔ ایسے افراد کو نشان عبرت بنایا جائے۔