کراچی (این این آئی) کراچی میں کورونا کے خلاف فرنٹ لائن پر جنگ لڑنے والے ڈاکٹرز سمیت طبی عملے کے 25 سے زائد افراد میں کورونا وائرس کی تصدیق ہوئی ہے۔ذرائع محکمہ صحت کے مطابق کراچی کے مختلف سرکاری اور نجی ہسپتالوں میں ڈاکٹرز سمیت پیرا میڈیکل اسٹاف کے 20 سے زائد افراد میں کورونا وائرس کی تصدیق ہوئی ہے۔
متاثرہ افراد میں قومی ادارہ برائے صحت اطفال کے دو ڈاکٹر اور دو پیرا میڈیکل اسٹاف کے ممبران، سول ہسپتال کے چار ملازم بشمول ڈاکٹر، عباسی شہید کے دو ڈاکٹرز اور لیاقت نیشنل ہسپتال کے شعبہ ریڈیولوجی کے ایک ڈاکٹر شامل ہیں ان کے علاوہ شہید بینظیر ٹراما سینٹر کے ڈاکٹر اور عملے سمیت 13 افراد ، ڈاؤ یونیورسٹی کے اوجھا کیمپس میں ڈاکٹر سمیت 8 افراد کورونا وائرس سے متاثر ہوئے ہیں۔ذرائع محکمہ صحت کے مطابق وائرس میں مبتلا ہونے والے ڈاکٹرز اور طبی عملے کو آئسولیشن میں رہنے کی ہدایت جاری کر دی گئی ہے۔ادھر آغا خان ہسپتال نے کورونا کی اسکرینگ اور ٹیسٹ کرنے سے معذرت کرلی ہے۔ہسپتال ذرائع کا کہنا ہے کہ عملے میں کورونا وائرس کی تصدیق پرمزید مریض لینے سے انکار کیا گیا ہے۔دوسری جانب ملتان کے نشتر ہسپتال کے ڈاکٹرز اور پیرا میڈیکل اسٹاف سمیت 18 افراد میں بھی کورونا وائرس کی تصدیق ہوئی ہے۔
