اسلام آباد (نیوز ڈیسک)کرونا وائرس کی وجہ سے بیرون ممالک میں پاکستانیوں کو شدید مشکلات کا سامنا ہے، حکومت سمندر پار پاکستانیوں کی امداد کیلئے میدان میں آ گئی ہے، حکومت بیرون ملک پاکستانیوں کو راشن فراہم کرے گی، اس کے لئے حکمت عملی مرتب کر لی گئی ہے،

حکومت نے وزیراعظم کے قائم کردہ کووڈ19 ریلیف فنڈ میں سمندرپار پاکستانیوں سے عطیات لینے کے لیے خصوصی ویب سائٹ لانچ کرنے کا اعلان کیا ہے۔ اپنے بیان میں وزیراعظم عمران خان کے معاون خصوصی برائے اوور سیز پاکستانیز زلفی بخاری نے کہا کہ بیرون ملک مقیم پاکستانیوں کے لیے جلد ایک ویب سائٹ لانچ جائے گی جس کے ذریعے سے وہ بھی وزیر اعظم کووڈ-19 ریلیف فنڈز میں اپنی عطیات جمع کرا سکیں گے۔ زلفی بخاری کے مطابق ویب سائٹ میں ایک اور خصوصیت بھی شامل کی گئی ہے جس کے ذریعے دنیا بھر میں بسنے والے تمام مخیر حضرات باآسانی ضرورت مند خاندانوں کے لیے راشن کی ذمہ داری اٹھا سکتے ہیں۔ان کا کہنا تھا کہ وزیر اعظم کورونا ریلیف ٹائیگر فورس میں بیرون ملک مقیم پاکستانیوں کو بھی بھرتی کرنے کا فیصلہ کیا ہے اور رجسٹریشن کے لیے ایک پورٹل قائم کیا جارہا ہے۔انہوں نے کہا کہ اوور سیز ٹائیگر فورس بیرون ملک پھنسے پاکستانیوں کو راشن مہیا کرنے میں حکومت کی مدد کرے گی۔وزیراعظم کے معاون خصوصی زلفی بخاری نے فیصلے پر عملدرآمد کیلئے اس حوالے سے عثمان ڈار سے ملاقات کی، جس میں بیرون ملک پھنسے پاکستانیوں کو کس طرح راشن دیا جائے اس طریقے کار پر مشاورت کی گئی۔