اسلام آباد (این این آئی)ہائی کورٹ میں ایران میں پھنسے زائرین کو پاکستان واپس لانے کے لئے مجلس وحدت المسلمین کی جانب سے درخواست دائرکر دی گئی ۔ منگل کو درخواست میں وفاقی حکومت، وزارت داخلہ، وزارت خارجہ، وزارت دفاع اور چیئرمین پیمرا کو فریق بنایا گیا ہے۔ درخواست میں کہاگیاکہ ہزاروں زائرین ایران میں پھنسے ہیں جن کے ویزا کی مدت ختم ہو چکی یا ہو رہی ہے، زائرین کو ایران جانے کے ویزے جاری کیے گئے لیکن
اب انہیں واپس پاکستان آنے کی اجازت نہیں دی جا رہی۔ درخواست میں کہاگیاکہ حکومت پاکستان بذریعہ زمینی راستے یا خصوصی فلائٹس کے ذریعے زائرین کو واپس لائے۔ درخواست میں استدعا کی گئی کہ عدالت حکومت کو زائرین کو فوری واپس لانے کے لئے اقدامات کرنے کے احکامات جاری کرے، ایران سے واپس لائے گئے زائرین کے میڈیکل ٹیسٹ کر کے وائرس میں مبتلا مریضوں کے علاج کا حکم دیا جائے۔ استدعا کی گئی کہ تفتان میں پہلے سے لا کر رکھے گئے زائرین کو تمام سہولیات فراہم کرنے کا حکم دیا جائے۔
