اسلام آباد (این این آئی) چیئرمین واپڈا مزمل حسین نے کہا ہے کہ پاکستان پانی کی قلت کے شکار ممالک کی فہرست میں شامل ہو چکا ہے۔پانی کے عالمی دِن کے موقع پر اپنے پیغام میں چیئرمین واپڈا مزمل حسین نے کہا کہ پاکستان اپنے دریائوں میں آنے والے سالانہ پانی کا صرف 10 فیصد ذخیرہ کر سکتا ہے ، دنیا میں پانی ذخیرہ کرنے کی اوسط صلاحیت 40 فیصد ہے۔چیئرمین واپڈا نے کہا کہ بد قسمتی سے ہمارے ڈیموں میں پانی ذخیرہ کرنے کی

صلاحیت ایک چوتھائی کم ہو گئی ہے۔ اْنہوں نے کہا کہ 1976ء میں ہماری پانی ذخیرہ کرنے کی صلاحیت 16 اعشاریہ 26 ملین ایکڑ فٹ تھی، جو کم ہو کر اب 13 اعشاریہ 68 ملین ایکڑ فٹ رہ گئی ہے۔چیئرمین واپڈا مزمل حسین نے کہا کہ پاکستان میں پانی ذخیرہ کرنے کی صلاحیت میں اضافہ کرنے کے لیے واپڈا نے ایک مربوط پروگرام تشکیل دیا ہے، جس کے مطابق قلیل، وسط اور طویل مدتی پلان کے تحت منصوبوں کو مکمل کیا جائے گا۔