کراچی(این این آئی) سندھ حکومت نے کرونا وائرس کی صورتحال کے پیش نظر وفاقی حکومت سے 2ماہ کے بجلی وگیس بل نہ لینے پر غور کرنے کی اپیل کی ہے۔تفصیلات کے مطابق ملک میں کرونا وائرس کی صورتحال کے پیش نظر سندھ حکومت نے وفاق سے عوامی ریلیف کے لیے اپیل کردی ہے۔

سندھ کے وزیر زراعت محمد اسماعیل راہو نے کہا ہے کہ وفاقی حکومت شہریوں سے2ماہ کیبجلی وگیس بل نہ لینے پرغورکرے اور شہریوں سے 2ماہ 300یونٹ بجلی کے بلزنہ لے۔اسماعیل راہو نے حکومت سے1000 روپے تک کے گیس بل بھی وصول نہ کرنے کی اپیل کرتے ہوئے کہا کہ شہری گھروں تک محدود ہیں، کاروبار بند ہیں، ریلیف ملناچاہئے۔صوبائی وزیر نے کہا کہ چھوٹے کاروباری، ملازمین، مزدور کاگزر مشکل وقت سے ہو رہا ہے، خان صاحب بھلے سندھ کوکوئی فنڈنہ دیں مگرعوام کوتوریلیف دیں، وفاقی حکومت پنجاب، بلوچستان، کے پی تک محدود نہ رہے۔خیال رہے کرونا وائرس کے پھیلائو روکنے کیلئے صوبائی حکومتوں نے شہریوں کوگھروں تک محدود رکھنے کیلئے سخت اقدامات کئے ہیں ، شادی بیاہ کے اجتماع سمیت دیگراجتماعات پرپابندی لگادی گئی ہے۔بازار اور مارکیٹس بھی بند ہیں جبکہ ریسٹورنٹس میں لوگوں کوکھانادینے پر پابندی ہے ، ہوم ڈیلیوری اورٹیک اوے کی اجازت ہے اور سندھ میں انٹرسٹی اور بین الصوبائی بس سروس مکمل بند ہے۔

موضوعات:بجلی و گیس کے بل نہ لینے کی اپیل