ریاض(آن لائن) سعودی عرب  کے مشہور صحرا الربع الخالی میں  پھنسے 3پاکستانیوں کو سعودی بارڈر سیکورٹی اہلکاروں نے انتھک محنت کے بعد تلاش کر لیا ۔سعودی نشریاتی ادارے کے مطابق تینوں پاکستانی صحرا میں اپنی گاڑی پر سفر کر رہے تھے جب ان کی گاڑی کے ٹائرریت کی کئی فٹ گہری تہہ میں دھنس گئے، بہت کوشش کے باوجود جب وہ ٹائر ریت سے باہر نکالنے میں ناکام رہے تو انہیں اپنی جان بچانے کی فکر ہو گئی،تینوں افراد 2،3روز تک اس وسیع ریگستان میں پھرتے رہے کہ

شاید کسی آبادی تک پہنچ جائیں، مگر انہیں کامیابی نہ ہو سکی۔ خوش قسمتی سے ان افراد کے جاننے والے نے عردہ صحرائی مرکز کو اطلاع دی کہ تینوں افراد سے رابطہ نہیں ہو پا رہا، جس کے بعد ان کو ڈھونڈنے کی خاطر ایک خصوصی ٹیم تشکیل دی گئی، اس ٹیم نے انتھک تلاش سے بالآخر انہیں 50کلومیٹر دْور ایک مقام پر تلاش کر لیا،ان نوجوانوں کی حالت بھْوک اور پیاس کے مارے بگڑی ہوئی تھی، جنہیں فوری طور پر قریبی صحت مرکز میں منتقل کیا گیا، جہاں ان کی حالت اب تسلّی بخش بتائی جا رہی ہے۔