پشاور(آن لائن)خیبر پختونخوا کے وزیر جنگالات و ماحولیات اور جنگلی حیات سید محمد اشتیاق ارمڑ نے کہا ہے کہ پاکستان تحریک انصاف عوام کی واحد نمائندہ جماعت ہے جو ملک بھر میں مثالی ترقیاتی کام کر کے نئے ریکارڈ قائم کرے گی اور انشاء اللہ بہت جلد پاکستانی عوام اپنی آنکھوں سے ریکارڈ قائم ہوتے دیکھے گی ۔انہوں نے کہا کہ موجودہ حکومت نے گرین پختونخوا بنانے کا تہیہ کر رکھا ہے۔
ان خیالات کا اظہار انہوں نے پشاور میں ایک تقریب سے خطاب کرتے ہوئے کیا ۔صوبائی وزیر نے کہا کہ عوام کی ترقی کیلئے تمام تر وسائل بروئے کار لائے جائیں گے اور اس بارے میں عوام کو مایوس نہیں کیا جائے گا۔انہوں نے واضح کیا کہ ترقیاتی سکیموں میں ارمڑ ، چمکنی ، ترناب ، میاں گجر ، لالا کلے ، سردار گڑھی پشاور وغیرہ یونین کونسلوں کی راہ میں قطعی کوئی رکاوٹ برداشت نہیں کی جائے گی، موجودہ حکومت عوام سے کئے گئے تمام وعدے بتدریج پورے کر رہی ہے اور عوام کی محرومیوں کا خاتمہ کر کے انہیں ترقی اور خوشحالی سے ہمکنار کرے گی۔وزیر ماحولیات نے عوام سے اپیل کی کہ صوبے کے کونے کونے میں رواں موسم بہار میں زیادہ سے زیادہ پودے لگا ئیں تاکہ صوبے کو گرین پختونخوا کے ساتھ ساتھ اقتصادی طور پر بھی مزید مستحکم بنایا جا سکے۔
