نئی دلی(این این آئی) جواہر لال نہرو یونیورسٹی کے طلباء پر پرُ تشدد حملے کے خلاف نئی دلی یونیورسٹی میں طلباء کے احتجاج کے دوران کشمیر کی آزادی کا پوسٹر دیکھا گیا ہے ۔ کشمیرمیڈیاسروس کے مطابق دلی یونیورسٹی کے سینٹ اسٹیفنز کالج کے طلبا نے گزشتہ روز اپنی کلاسوں کا بائیکاٹ کرتے ہوئے جواہر لال نہرو یونیورسٹی کے طلباء کے ساتھ اظہار یکجہتی کیلئے زبردست احتجاجی مظاہرہ کیا۔
مظاہرے میں شریک ایک طالب علم کو کشمیر کی آزادی کے حوالے سے پوسٹر اٹھائے دیکھا گیا ہے ۔ طلباء نے آزادی کے حق میں نعرے بھی لگائے۔اس سے قبل جواہر لال نہرو یونیورسٹی کے طلباء پر تشدد کے خلاف ممبئی میں ایک مظاہرے کے دوران ایک خاتون کو کشمیر کی آزادی کا پلے کارڈ اٹھائے دیکھا گیا تھا ۔ ممبئی پولیس نے بعد ازاں کشمیر کی آزادی کا پلے کارڈ اٹھانے والی خاتون مہک مرزا کے خلاف ایف آئی آردرج کی تھی۔
