لاہور( این این آئی )ایف آئی اے سائبر کرائم سیل نے فیس بک پر سابق وزیر پانی وبجلی عابد شیر علی کے نام پر خاتون کو نوکری کا جھانسہ دینے والے ملزم کو گرفتار کرلیا۔ ڈپٹی ڈائریکٹر سائبر کرائم سیل سرفراز چوہدری کی قیادت میں ٹیم نے ملزم سید راشد عرفان کو گرفتار کیا ۔ ملزم نے سوشل میڈیا پر خاتون
مریم گل کو واپڈا میں نوکری کا جھانسہ دیا تھا جس کی درخواست ملنے پر ایف آئی اے سائبر سیل نے مقدمہ درج کیا۔ ملزم فیصل آباد سے لاہور آیا اور خاتون کو ملنے کیلئے کہا۔ایف آئی اے کی ٹیم نے ملزم سید راشد عرفان کو لاہور سے گرفتار کرکے کیس مزید تحقیقات کیلئے انوسٹی گیشن سیل کو بھجوادیا۔
