کراچی(آن لائن) ملک کے زرمبادلہ ذخائر 2 سال کی بلند ترین سطح پر جا پہنچے، اسٹیٹ بینک کے ذخائر 58 کروڑ ڈالر اضافیسے 11.48ارب ڈالر ہوگئے، کل زرمبادلہ ذخائر 18 ارب 8 کروڑ ڈالر ہوگئے۔ تفصیلات کے مطابق ملک کے زرمبادلہ ذخائر میں اضافے کا سلسلہ جاری ہے اور اب ذخائر 2 سال کی بلند ترین سطح پر پہنچ گئے ہیں۔
اسٹیٹ بینک کی جانب سے جاری کردہ رپورٹ کے مطابق ملکی زرمبادلہ ذخائر میں 58 کروڑ ڈالرز کا اضافہ ہوا ہے۔58 کروڑ ڈالرز اضافے سے اسٹیٹ بینک کے اپنے زرمبادلہ ذخائر 11 ارب 48 کروڑ ڈالرز کی سطح پر پہنچ گئے ہیں۔ دوسری جانب کمرشل بینکوں کے زرمبادلہ ذخائر 6 ارب 60 کروڑ ڈالرز کی سطح پر ہیں۔ یوں ملک کے کل زرمبادلہ ذخائر 18 ارب 8 کروڑ ڈالرز کی بلند ترین سطح پر پہنچ گئے ہیں۔ملکی زرمبادلہ ذخائر 21 ماہ کے بعد 18 ارب ڈالرز کی سطح کو عبور کیے ہیں۔ دوسری جانب ملک کے زرمبادلہ ذخائر میں اضافے کے باوجود کرنسی مارکیٹ میں ڈالر کی قدر میں اضافہ دیکھنے میں آیا ہے۔ملک بھر میں رواں ہفتے کے چوتھے کاروباری روز کے دوران اوپن مارکیٹ اور انٹر بینک میں امریکی ڈالر مزید مہنگا ہو گیا۔ رواں ہفتے کے چوتھے کاروباری روز اور رواں سال کے دوسرے کاروباری روز کے دوران اوپن مارکیٹ میں روپے کے مقابلے میں امریکی کرنسی 10 پیسے بڑھی جس کے بعد ایک امریکی ڈالر کی قیمت 155 روپے 10 پیسے کی سطح پر پہنچ گئی۔ دوسری طرف اوپن مارکیٹ کی طرح انٹر بینک میں امریکی کرنسی کی قدر میں دو پیسے کا اضافہ دیکھا گیا، اس اضافے کے باعث انٹر بینک میں روپے کے مقابلے میں ایک امریکی ڈالر کی قیمت 154 روپے 87 پیسے کی سطح پر پہنچ گئی۔
