بغداد(این این آئی)عراق میں الصدری گروپ کے سربراہ مقتدی الصدر نے واشنگٹن اور تہران کے درمیان جنگ بھڑکنے اور اس جنگ میں عراق کو گھسیٹے جانے کے خطرات سے خبردار کیا ہے۔عرب ٹی وی کے مطابق الصدر کا یہ موقف ایک ٹویٹ میں سامنے آیا۔شیعہ رہ نما کی ٹویٹ عراق کے مغرب میں واقع ضلع القائم میں الحشد الشعبی کے ٹھکانوں پر امریکی فضائی بم باری کے بعد سامنے آئی ۔ الصدر کے مطابق جو کوئی بھی اس جنگ میں عراق کو گھسیٹے گا وہ عراقی عوام کا دشمن ہو گا۔عراقی رہ نما نے
اپنی ٹویٹ میں واضح کیا کہ میں ایران اور امریکا کے درمیان جنگ کے بھڑکنے کے ساتھ نہیں ہوں اور نہ میں اس جنگ میں عراق کو گھسیٹے جانے کے حق میں ہوں۔انہوں نے مزید کہا کہ ہمیں قوم کے بڑوں کے ایک سنجیدہ موقف کی ضرورت ہے تا کہ ہم عراق کو اس گھمسان کی لڑائی سے دور رکھ سیں جو ہر خشک و تر چیز کو کھا جائے گی ، ہمیں اس بات کی ضرورت ہے کہ عراقی عوام اس جنگ کی اور اس میں عراق کو جھونکنے کی مذمت میں آواز اٹھائیں۔
