مظفرآباد(این این آئی)آزادجموں وکشمیر حکومت کے وزیر ٹرانسپورٹ،وائلڈ لائف فشریز ناصر حسین ڈار نے کہا ہے کہ مقبوضہ جموں وکشمیر دنیا کی سب سے بڑی مقتل گاہ بن چکی ہے،بھارت عالمی قوانی کو پاؤں تلے روند کر ایٹمی جنگ چھیڑنے کے حالات پیدا کررہا ہے۔جس سے دنیا بھر کا امن ریزہ ریزہ ہوجائے گا۔

اگر بھارت نے حملے کی احمقانہ حرکت کی تو پاک سرزمین کو بھارت کی افواج کے ناپاک قدموں کی پیش قدمی پر شمشان گھاٹ بنانے کا قوم اپنی بہادر افواج سے ملکر مصمم ارادہ کرچکی ہے۔ان خیالات کا اظہار انہوں نے مقبوضہ جموں وکشمیر میں کرفیو کے نافذ،لاک ڈاؤن کے 148ایام اور نہتے کشمیریوں کے بیہمانہ قتل پر اپنے شدید رد عمل میں کیا۔انہوں نے کہا کہ حریت کانفرنس کے راہنماؤں کی بلاجواز نظر بندی،ہزاروں آزادی پسندوں کی گرفتاریاں بھارت کے سیکولرازم اور جمہوری دعوؤں پر کلنک کا ٹیکہ ہیں۔ناصر حسین ڈار نے کہا کہ بھارت درجنوں علیحدگی کی تحریکوں کو طاقت کے ذریعے کچلنے میں کبھی کامیاب نہیں ہوسکتا،جبکہ تحریک آزادی کشمیر علیحدگی نہیں حق خود ارادیت کی عالمی سطح پر تسلیم شدہ تحریک ہے یہ نہ زمینی جھگڑا ہے اور نہ مذہبی تنازعہ یہ ایک مکمل جمہوری مسئلہ ہے جسے بھارت نے خود اقدام متحدہ کے فورم پر جاکر اسے پیش کیا اور پنڈت جواہر لال نہرو نے بھی آزادی کے وعدے کیے۔وزیر حکومت نے کہا کہ مسلم لیگ ن کی حکومت وزیراعظم آزادکشمیر راجہ فاروق حیدر خان کی قیادت میں قومی وقار،ریاستی تشخص کی محافظ اور شہیدوں کے خون کی امین ہے۔جنرل قمر جاوید باجوہ کی حکمت عملی نے بھارت کے حواس باختہ کردیئے ہیں۔