نیب نے آج پاکستان مسلم لیگ ن کے ایک اور اہم لیڈر احسن اقبال کو بھی گرفتار کر لیا،ان پر نارووال سپورٹس کمپلیکس میں کرپشن کے الزامات ہیں، احسن اقبال نے نیب کے سامنے پیشی سے پہلے میڈیا ٹاک کی، احسن اقبال کی گرفتاری کے بعد پاکستان مسلم لیگ ن نے اپنی خاموشی توڑ دی، پارٹی نے جنرل پرویز مشرف کے فیصلے کے بعد چپ کی لمبی چادر تان لی تھی‘

مریم اورنگزیب نے آج پریس کانفرنس کر کے خاموشی توڑ دی، یوں محسوس ہوتا ہے پارٹی احسن اقبال کی گرفتاری پر بہت پریشان اور غصے میں ہے، آج مفتاح اسماعیل کی ضمانت کے بعد احسن اقبال کی گرفتاری نے نیب کے خلاف تبصروں کا ایک نیا پنڈورا باکس کھول دیا، نیب نے کل بلاول بھٹو کو بھی طلب کر رکھا تھا، آج بلاول بھٹو نے پریس کانفرنس کی اور نیب کے بارے میں کہا کہ نیب کے تمام سوالات کا جواب دے چکا ہوں اور نیب کے سوالنامے کا 6ماہ قبل نوٹس دیا تھا پھر24 دسمبر کو کس بنیادپر طلب کیاگیا۔ چیئرمین نیب نے کہاتھاکہ بی آر ٹی کا ریفرنس تیارہے۔انہوں نے سوال کیا کہ کیا خیبرپختونخواہ میں کسی وزیر کو نیب کانوٹس ملا؟ ایک طرف ملک کے اندر کی صورت حال مخدوش ہے اور دوسری طرف بھارت نے ایل او سی پر ٹھیک ٹھاک چھیڑ چھاڑ شروع کر دی،ایل او سی پر میزائل تک نصب کر دیے گئے، وزیر خارجہ شاہ محمود قریشی نے دعویٰ کیا،مودی سرکار خطرناک کھیل، کھیل رہی ہے، جس سے پورے خطے کا امن متاثر ہورہا ہے‘دنیا کواس صورتحال کا نوٹس لیناچاہیے، آر ایس ایس کی ہندوتوا سوچ نے بھارت کو تقسیم کر دیا ہے، خدشہ ہے کہ کرسمس کی تعطیلات کے دوران بھارت کوئی ناٹک رچا سکتا ہے، ملک کے اندرونی اور بیرونی دونوں حالات خراب ہیں،ان حالات میں حکومت کا کیا رد عمل ہوناچاہیے؟