کراچی (این این آئی)پاکستان مسلم لیگ (ن) کے رہنما سابق گورنر محمد زبیر نے عبدالحفیظ شیخ کے ٹوئٹ پر ردِعمل دیتے ہوئے کہا ہے کہ حکومت جس چیز کو اپنی کامیابی دکھارہی ہے، وہ دراصل حکومت کی نااہلی اور نالائقی ہے۔ کرنٹ اکانٹ میں بہتری برآمدات میں اضافے کے ذریعے حاصل نہیں ہوئی۔پاکستان مسلم لیگ (ن) کے رہنما سابق گورنر محمد زبیر نے عبدالحفیظ شیخ کے ٹوئٹ پر ردِعمل دیتے ہوئے کہا کہ

کرنٹ اکاؤنٹ میں بہتری کا مطلب درآمدات میں کمی ہے۔ کرنٹ اکانٹ میں بہتری برآمدات میں اضافے کے ذریعے حاصل نہیں ہوئی۔ حکومت جس چیز کو اپنی کامیابی دکھارہی ہے، وہ دراصل حکومت کی نااہلی اور نالائقی ہے۔ درآمدات میں کمی کے نتیجے میں ملک میں معاشی سرگرمیوں کا بیڑہ غرق ہوچکا ہے۔محمد زبیر نے کہا کہ خام مال، پلانٹس اور مشینری کی درآمد میں کمی سے معاشی سرگرمیاں سست روی کاشکار ہیں۔ موجودہ حکومت کی نااہلی سے سولہ ماہ میں معیشت کو 40 ارب ڈالرز کا نقصان ہوچکا ہے۔ معاشی تباہی سے دس لاکھ لوگ بے روزگار اور اسی لاکھ غربت کے جہنم میں دھکیلے جاچکے ہیں۔ معیشت کے جمود سے ٹیکس وصولیاں کم ہوچکی ہیں۔ زرمبادلہ میں ذخائر میں اضافے کی وجہ پاکستان میں شرح سود میں اضافہ ہے۔انہوں نے کہا کہ یہ پاکستان کے معاشی مفاد میں نہیں بلکہ پاکستان کو بھاری نقصان اٹھانا پڑے گا۔ ہاٹ منی کے ذریعے پاکستان سے لوگ نفع کما کر بیرون ملک لے جائیں گے۔ اس حماقت سے پاکستان میں کاروبار کا قتل عام جاری ہے۔ پاکستان میں شرح سود زیادہ ہونے سے ملکی کاروبار ٹھپ اور باہر کے سرمایہ کار فائدہ اٹھارہے ہیں جو حماقت ہے۔سابق گورنر سندھ نے مزید کہا کہ نااہل حکومت کے اقدامات پاکستان کی معیشت پر خودکش حملہ ہے۔ معیشت کا گلا گھونٹ دیاگیا ہے۔ حکومت کی حماقت در حماقت سے افراط زر تاریخ کی بلند ترین شرح کی طرف گامزن ہے۔