اسلام آباد(این این آئی)وزیراعظم عمران خان جنیوا کا دورہ کریں گے جہاں وہ سترہ دسمبر کو منعقدہ گلوبل ریفیوجی فورم (جی آر ایف) کے اولین اجلاس کی مشترکہ میزبانی کریں گے۔ مہاجرین کے لئے اقوام متحدہ کے ہائی کمشنر (یواین ایچ سی آر) اور سویٹزرلینڈ ’جی آر ایف‘ کی مشترکہ میزبانی کررہے ہیں۔
مہاجرین کی دیکھ بھال اور تحفظ میں مثالی کردار کے اعتراف میں وزیراعظم عمران خان کو صدر طیب اردوان اور کوسٹا ریکا، ایتھوپیا، جرمنی کے رہنماوں کے ہمراہ فورم کی مشترکہ میزبانی کے لئے مدعو کیاگیا ہے۔ گلوبل ریفیوجی فورم اکیسویں صدی میں مہاجرین پر سب سے بڑا اجلاس ہے جسے سترہ اوراٹھارہ دسمبر دوہزار انیس کو سویٹزرلینڈ حکومت مہاجرین کے لئے اقوام متحدہ کے ادارے کی مشترکہ میزبانی میں منعقد کیاجارہا ہے۔ اقوام متحدہ کے سیکریٹری جنرل انتونیو گوتیرس بھی فورم سے خطاب کریں گے۔ فورم کا مقصد دنیا میں مہاجرین کی بڑھتی ہوئی تعداد کے مسئلے سے نمٹنے کے لئے ریاستوں، عالمی تنظیموں، نجی شعبہ اور سول سوسائیٹی کے عملی تعاون اورا مداد میں اضافہ کرنا ہے تاکہ دنیا میں اس مسئلے سے نمٹنے میں مددمل سکے۔ وزیراعظم پاکستان گزشتہ چالیس سے ہجرت کرکے پاکستان آنے والے افغان بھائیوں اور بہنوں کی فراخدلانہ میزبانی، پاکستانی قوم کے بے مثال ایثار وقربانی، اس مسئلہ کے حوالے سے تجربات اورنکتہ نگاہ پیش کریں گے۔ وزیراعظم جنیوا میں قیام کے دوران اقوام متحدہ کی قیادت سے ملاقاتیں بھی کریں گے جبکہ سیکریٹری جنرل اقوام متحدہ کی طرف سے دئیے جانے والے ظہرانہ میں بھی شریک ہوں گے۔
