اسلام آباد(آن لائن)وفاقی وزیر داخلہ اعجاز شاہ نے کہا ہے کہ پی آئی سی واقعہ میں ملوث 35سے 40وکلاء کی شناخت ہوگئی، ذمہ داروں کو سبق سکھائیں گے۔ آصف علی زرداری کی رہائی سے حکومت کا کوئی تعلق نہیں جبکہ کسی قسم کے لین دین کی بات بھی نہیں ہوئی۔ نیب پلی بارگین کرنے میں آزاد ہے۔ آصف علی زرداری کے لئے کوئی این آر او نہیں جبکہ نواز شریف کو بھی ڈیل یا ڈھیل نہیں دی گئی۔

حکومت مریم نواز کو باہر نہیں جانے دے گی۔ وفاقی حکومت کو سندھ سے متعلق بہت تشویش ہے سندھ حکومت تو اپنا کچرا بھی نہیں اٹھا سکتی، چاہتے ہیں ملک میں قبل از وقت انتخابات کا کوئی امکان نہیں ہے۔ جمعرات کے روز نجی ٹی وی کو انٹرویو دیتے ہوئے اعجاز شاہ نے کہا ہے کہ پاکستان انسٹی ٹیوٹ آف کارڈیالوجی لاہور میں ہونیوالے واقعے میں 35سے 40وکلاء کی شناخت ہوگئی ہے۔ ذمہ داروں کو سبق سکھایا جائے گا۔ انہوں نے کہاکہ عالمی جنگوں میں بھی دشمن کے جہاز ہسپتالوں پر حملے نہیں کرتے معاشرے کے تمام طبقات کو سوچنا چاہیے کہ ہم اخلاقی طورپر اتنے گرچکے ہیں کہ اپنے بیماروں کو بھی نہیں چھوڑتے۔ وزیر داخلہ نے کہا کہ نواز شریف کی بیماری پر کسی کو کوئی شک نہیں ہے ان کے باہر جانے میں کوئی ڈیل یا ڈھیل نہیں ہے۔ انہوں نے کہاکہ نواز شریف کی دیکھ بھال کیلئے دو بیٹے اور ایک بیٹی لندن میں موجود ہیں جبکہ ان کے داماد اور سمدھی بھی لندن میں ہی ہیں میرا نہیں خیال کہ حکومت مریم نواز کو باہر جانے کی اجازت دے گی۔ اعجاز شاہ نے کہا کہ پر امن احتجاج جمہوریت کا حسن ہے اور پُر امن احتجاج کو نہ روکنا اصل جمہوریت ہے۔ مولانا فضل الرحمان 50ہزار افراد کو اسلام آباد لے کر آئے ہم نے انہیں نہیں روکا۔ وکلاء پُر امن احتجاج کا وعدہ کرکے نکلے تھے اس لئے انہیں بھی راستے میں نہیں روکا گیا۔ انہوں نے کہاکہ سابق صدر آصف علی زرداری کی رہائی میں حکومت کا کوئی عمل دخل نہیں ہے ان کے خلاف صرف انویسٹی گیشن چل رہی ہے۔