اسلام آباد (این این آئی)پارلیمنٹرینز اور اراکین صوبائی اسمبلیوں کے مالی سال 2018-19 کے گوشواروں کی تفصیلات جمع کرانے کے معاملے پر الیکشن کمیشن نے پارلیمنٹرینز اور اراکین صوبائی اسمبلیوں کو ایک بار پھر یاددہانی کا نوٹس بھیج دیا۔ ایک بیان میں الیکشن کمیشن نے پارلیمنٹرینز اور اراکین صوبائی اسمبلیوں کو 31 دسمبر تک مالی گوشواروں کی تفصیلات جمع کرانے کی ہدایت کی۔

الیکشن کمیشن نے کہاکہ تمام پارلیمنٹریز اور اراکین صوبائی اسمبلی اپنے بیوی بچوں اور زیر کفالت افراد کے گوشواروں کی تفصیلات جمع کرائیں۔الیکشن کمیشن نے کہاکہ 31 دسمبر تک گوشواروں کی تفصیلات جمع نہ کرانے والے پارلیمنٹرینز کی رکنیت معطل کر دی جائے گی۔الیکشن کمیشن کے مطابق الیکشن کمیشن یکم جنوری کو گوشواروں کی تفصیلات جمع نہ کرانے والے پارلیمنٹیرینز کی تفصیلات جاری کرے گا۔الیکشن کمیشن نے کہاکہ الیکشن کمیشن گوشواروں کی تفصیلات جمع نہ کرانے والے اراکین قومی و صوبائی اسمبلی اور سینیٹرز کی رکنیت 16 جنوری کو معطل کر دے گا۔الیکشن کمیشن کے مطابق رکنیت معطل ہونے والے اراکین کسی بھی اجلاس اور قانون سازی میں حصہ نہیں لے سکیں گے۔الیکشن کمیشن کے مطابق گوشواروں کی غلط تفصیلات دینے والے پارلیمنٹرینز اور اراکین صوبائی اسمبلیوں کے خلاف کاروائی کی جائے گی۔الیکشن کمیشن کے مطابق گوشواروں سے متعلق فارم الیکشن کمیشن کے دفاتر سے حاصل کئے جا سکتے ہیں۔