لاہور(این این آئی)پاکستان مسلم لیگ (ن) کے مرکزی رہنماطارق فضل چوہدری نے کہا ہے کہ نواز شریف کی بیماری کے دوران جتنے میڈیکل بورڈز تشکیل دئیے گئے وہ سب حکومت کی جانب سے بنائے گئے تھے،نواز شریف کی بیماری پر جو سیاست کی جا رہی ہے ہم ان کی بھرپور مذمت کرتے ہیں۔ایک انٹر ویو میں انہوں نے نواز شریف کی لندن میں شاپنگ کرتے ہوئے وائرل ہونے والی تصویر کے حوالے بتایا کہ یہ تصویر تقریباً 3 سال پرانی ہے لہٰذاحقیقت معلوم کرنے سے پہلے کسی قسم کے تبصرے سے گریز کرنا چاہیے۔
ا نہوں نے کہا کہ ڈاکٹر یاسمین راشد نے خود نوازشریف کی بیماری کے حوالے سے قوم کو بتایا اب وہ کیوں چھپ رہی ہیں۔(ن) لیگ کے دور میں مریضوں کو جو سہولیات دی جا رہی تھیں وہ تحریک انصاف نے آ کر ختم کر دیں۔انہوں نے کہا کہ پاکستان میں نواز شریف کی بیماری کی تشخیص نہیں ہو پا رہی تھی اس لیے بیرون ملک جانے کا مطالبہ کیا گیا تھا۔انہوں نے کہاکہ ہر ناکامی کا الزام پچھلی حکومتوں پر ڈالنا مسئلے کا حل نہیں، حکومت کو چاہیے کہ اصل مسائل کی طرف توجہ دے۔
