اسلام آباد(آن لائن)وزیراعظم عمران خان نے اپوزیشن سے ہونے والے رابطوں پر اطمینان کا اظہار کیا ہے۔ تفصیلات کے مطابق وزیراعظم عمران خان نے جمیعت علمائے اسلام (ف) کے آزادی مارچ سے متعلق اپوزیشن سے ہونے والے رابطوں پر اظہارِ اطمینان کرتے ہوئے اس سلسلے میں اسپیکر قومی اسمبلی کے پارلیمانی کردار کی تعریف کی۔
وزیراعظم عمران خان سے ہونے والی اسپیکر قومی اسمبلی اسد قیصر کی ملاقات میں ملک کی موجودہ سیاسی صورتحال اور پارلیمانی امور پر تبادلہ خیال کیا گیا۔ اسپیکر اسد قیصر نے وزیراعظم کو مسئلہ کشمیر پر پارلیمانی سفارتکاری سے آگاہ کیا اور پارلیمنٹ میں قانون سازی اور ایوان کے موثر کردار پر بھی بات چیت کی۔ اسپیکر قومی اسمبلی اسد قیصر نے سیاسی صورتحال اور حزب اختلاف سے رابطوں پر وزیراعظم کو آگاہ کرتے ہوئے کہا کہ اپوزیشن کو پیغام دیا کہ امن و امان کی صورت حال پر سمجھوتہ نہیں ہوگا، کسی بھی قسم کا سیاسی انتشار نہیں پھیلنا چاہئے، اپوزیشن ارکان سے مسلسل رابطے میں ہیں اور معاملات کو افہام و تفہیم سے حل کرنے کی کوشش کر رہے ہیں، جس پر وزیراعظم عمران خان نے اطمینان کا اظہار کیا۔وزیراعظم عمران خان نے اپوزیشن سے مذاکرات کرنے والی حکومتی ٹیم سے بھی ملاقات کی جس میں وزیراعظم کو مذاکرات میں ہونے والی پیش رفت سے متعلق آگاہ کیا گیا۔ پرویز خٹک نے بتایا کہ ہم اپوزیشن سے مسلسل رابطے میں ہیں۔ ذرائع نے بتایا کہ وزیراعظم عمران خان نے کہا کہ اپوزیشن معاہدے پر قائم رہتی ہے توحکومت بھی پاسداری کرے گی۔
اپوزیشن کی جانب سے معاہدے کی خلاف ورزی پرکارروائی ہوگی۔ وزیراعظم عمران خان نے ہدایت کی کہ اسلام آباد کے رہائشیوں کو کسی قسم کا مسئلہ درپیش نہیں ہونا چاہئے۔دوسری جانب آزادی مارچ لاہور سے اسلام آباد کی طرف چل پڑا ہے اور رات کو کسی بھی وقت وفاقی دارالحکومت پہنچ جائیگا۔
