کولمبو( آن لائن )ٹیسٹ چیمپئن شپ کیلئے سینئرسری لنکنز کی پاکستان آمد پر سوالیہ نشان عائد ہے ،آئی لینڈ بورڈ دسمبر میں کراچی اور راولپنڈی میں2 ٹیسٹ میچز کھیلنے پر تقریبا آمادہ ہو چکاہے، محدود اوورز کے ٹور کا بائیکاٹ کرنے والے ٹاپ کرکٹرز پر نگاہیں پھر مرکوز ہوگئیں۔تفصیلات کے مطابق سری لنکا کرکٹ بورڈ پاکستان میں 2 ٹیسٹ میچز کی سیریز کھیلنے پر تقریباً
رضامند نظر آتا ہے البتہ ابھی باضابطہ طور پر اس کا اعلان نہیں کیا،یہ کسی بھی ٹیم کی2009 کے آئی لینڈرز پر ہی ہونیوالے دہشتگرد حملے کے بعد پاکستان میں پہلی ٹیسٹ سیریز ہوگی، ستمبر اکتوبر میں کراچی اور لاہور میں ون ڈے اور ٹونٹی 20 سیریزکامیابی سے منعقد ہوئی، پی سی بی سری لنکا پر ٹیسٹ چیمپئن شپ کیلئے ٹیم پاکستان بھیجنے پر زور دے رہا ہے جس پر اب آئی لینڈ بورڈ تیار نظر آتا ہے، 2 ٹیسٹ میچز کی یہ سیریز کراچی اور راولپنڈی میں دسمبر میں کھیلی جائیگی، لاہور میں بہت زیادہ دھند ہونے کے باعث اسے وینیوز کی فہرست میں شامل نہیں کیا گیا،2009 کے بعد سے پاکستان اپنی تمام ٹیسٹ سیریز نیوٹرل وینیوز پر کھیل رہا تھا جس میں سے زیادہ تر طویل فارمیٹ کے میچز یو اے ای میں منعقد ہوئے، اس میں اخراجات بھی زائد ہوتے تھے۔اب سب کی نگاہیں ایک بار پھر سری لنکا کے ان سینئر کھلاڑیوں پر مرکوز ہوچکی ہیں، جنھوں نے اس سے قبل سکیورٹی خدشات کا عذر پیش کرکے محدود اوورز کے میچز کیلئے پاکستان آنے سے انکار کردیا تھا، اب یہ دیکھنا ہوگا کہ وہ 2ٹیسٹ میچز کیلئے آنے پر راضی ہوتے ہیں یا نہیں۔
