ماسکو(آن لائن)روس نے کہا ہے کہ ماسکو ایران کے بوشہر ایٹمی بجلی کے دوسرے یونٹ کی تعمیر کا کام پروگرام کے مطابق جاری رکھے گا۔ ترجمان روسی وزارت خارجہ ماریا زاخارووا نے میڈیا سے بات چیت کرتے ہوئے کہا کہ بوشہر ایٹمی بجلی گھر کی تعمیر ایران میں روس کا سب سے اہم پرجیکٹ ہے جس کے پہلے مرحلے کار آغاز ہو گیاہے اور یہ بجلی گھر ایران کی ضرورت کے لئے بجلی تیار کر رہا ہے۔ ترجمان نے کہا کہ بوشہر

ایٹمی بجلی گھر کے دوسرے یونٹ کی تعمیر کا کام پروگرام کے تحت مکمل ہوجائے گا۔ انہوں نے اپنی ہفتہ وار پریس بریفنگ میں کہا کہ واشنگٹن کی غیر قانونی پابندیوں نے ایران کے ساتھ تجارت کی راہ میں مشکلات کھڑی کردی ہیں لیکن تہران اور ماسکو بوشہرایٹمی بجلی گھر کی تعمیر میں اپنا تعاون جاری رکھیں گے۔ روسی وزارت خارجہ کی ترجمان نے کہا کہ ماسکو امریکی پابندیوں کے مقابلے میں ہاتھ پہ ہاتھ دھرے نہیں بیٹھا ہے اور وہ ایران کے ساتھ تجارتی تعاون کے لئے خود کو تیار کر رہا ہے۔

موضوعات:روس