ممبئی (این این آئی) بھارتی صحافتی تنظیم نے رپورٹر سے بدتمیزی کرنے پر بالی ووڈ اداکارہ کنگنا رناوت کا بائیکاٹ کردیا ۔ میڈیا رپورٹ کے مطابق بھارتی اداکارہ کنگنا رناوت کو شاید ہی بالی ووڈ میں کوئی پسند کرتا ہوگا جس کی وجہ ان کا سخت لہجہ اور ہر اس شخص پر تنقید کرنے کا انداز ہے جو انہیں پسند نہیں آتا، ان کا جھگڑا، دپیکا پڈوکون، کرن جوہر، عالیہ بھٹ، رنبیر کپور، ریتھک روشن، سونم کپور، ادیتیہ پنچولی

اور کئی نامور ستاروں سے ہوچکا ہے۔تاہم اتنے سالوں میں بھارتی میڈیا ہمیشہ کنگنا رناوت کو سپورٹ کرتا رہا ،تاہم اب بھارتی صحافتی تنظیم نے بھی کنگنا رناوت کا بائیکاٹ کرنے کا فیصلہ کیا ہے اور اداکارہ کو کسی بھی قسم کی میڈیا کوریج دینے سے انکار کردیاہے۔کنگنا رناوت اپنی جلد ریلیز ہونے والی فلم ’ججمنٹل ہے کیا‘ کے میوزک لانچ کی تقریب میں فلم کی باقی ٹیم کیساتھ شریک ہوئیں،اس دوران جسٹن راؤ نامی صحافی نے کنگنا رناوت سے فلم کے حوالے سے سوال پوچھنا چاہا، تاہم کنگنا نے انہیں تنقید کا نشانہ بناتے ہوئے کہا کہ وہ ان کے سوالات کا جواب نہیں دیں گی، کیونکہ وہ اس سے قبل ان کی فلم ’منی کارنیکا‘ کے خلاف بھی غلط باتیں تحریر کرتے آرہے ہیں۔کنگنا رناوت نے جسٹن کی سوچ کو منفی کہتے ہوئے کہا کہ وہ ان کے دشمن بن چکے ہیں اور ان کے بارے میں گھٹیا باتیں لکھ رہے ہیں۔تاہم اس دوران جسٹن کنگنا کی جانب سے لگائے الزامات کو بے بنیاد ٹھہراتے رہے جبکہ انہوں نے کنگنا سے ان الزامات کے ثبوت بھی مانگے۔رپورٹر نے کنگنا رناوت کو تنقید کا نشانہ بناتے ہوئے کہا کہ یہ انداز صحیح نہیں، اگر آپ ایک طاقتور مقام پر بیٹھی ہیں اس کا یہ مطلب بالکل نہیں کہ وہ رپورٹرز کو ڈرائیں۔اس موقع پر فلم کی پروڈیوسر ایکتا کپور نے صحافیوں سے وعدہ کیا کہ وہ بعدازاں اس معاملے کو خود حل کریں گی،اس واقعے کی ویڈیو سوشل میڈیا پر سامنے آنے کے بعد کنگنا رناوت کو شدید تنقید کا نشانہ بنایا گیاجبکہ صحافتی تنظیم نے فلم کی پروڈیوسر ایکتا کپور سے مطالبہ کیا کہ کنگنا رناوٹ کو رپورٹر سے معافی مانگنی ہوگی اور ایسا نہ ہونے پر وہ کنگنا رناوت کو اس فلم کی تشہیر کے دوران کوئی میڈیا کوریج نہیں دیں گے، جبکہ مستقبل میں بھی ان کا بائیکاٹ کریں گے۔دوسری جانب کنگنا رناوت کی بہن اور منیجر رنگولی نے اپنی ایک ٹویٹ میں

صحافتی تنظیم کو سخت تنقید کا نشانہ بناتے ہوئے یہ واضح کردیا کہ کنگنا کسی سے بھی معافی نہیں مانگیں گی۔رنگولی کا اپنی ٹویٹ میں کہنا تھا کہ ایک بات تو میں وعدہ کرکے کہہ سکتی ہوں کہ کنگنا کی جانب سے کوئی معافی نہیں مانگی جائے گی۔یاد رہے کہ فلم ججمینٹل ہے کیا میں کنگنا رناوت کے ہمراہ راج کمار راؤ بھی مرکزی کردار نبھا رہے ہیں۔فلم رواں ماہ 26 جولائی کو سینما گھروں میں نمائش کے لیے پیش کی جائے گی۔

موضوعات:کنگنا رناوت