کراچی /لاہور(آن لائن )پاکستان کارپٹ مینو فیکچررز اینڈ ایکسپورٹرز ایسوسی ایشن نے حکومت سے رواں سال ستمبر میں لاہور میں منعقدہو نے والی کارپٹ کی 37ویں بین الاقوامی نمائش کے تیاریوں کیلئے فنڈز جلد ریلیز کرنے کا مطالبہ کرتے ہوئے کہا ہے کہ اس کے بغیر غیر ملکی خریداروں کو حتمی پیکج کی پیشکش نہیں کی جا سکتی ،بیرون ممالک ابتدائی رابطے مکمل ہو گئے ہیں اور
غیر ملکی خریداروں کی جانب سے مثبت رد عمل ظاہر کیا گیا ہے ۔ ایسوسی ایشن کے زونز کا مشترکہ اجلاس چیئرمین نعیم ساجد کی زیر صدارت منعقد ہوا ۔ اس موقع پر سینئر مرکزی رہنما عبد اللطیف ملک، سینئر ممبر ریاض احمد، سی ٹی آئی کے سابق چیئر پرسن سعید خان ، اکبر ملک ، میجر اختر نذیر سمیت دیگر بھی موجود تھے۔ اجلاس کے دوران شرکاء نے نمائش کی ابتدائی تیاریوں کے حوالے سے تفصیلی غور و خوض کیا اور حکومت سے پرزور مطالبہ کیا گیا کہ فی الفور فنڈز ریلیز کئے جائیں تاکہ غیر ملکیوں سے ہونے والے ابتدائی رابطوںکو حتمی شکل دی جاسکے ۔ ایسویسی ایشن کے چیئرمین نعیم ساجد نے کہا کہ کارپٹ کی 37ویں عالمی نمائش سے ہمار ی انڈسٹری کو تقویت ملے گی ۔ حکومت کو چاہیے کہ برآمدات کے فروغ کیلئے اقدامات کے تناظر میں ہماری معاونت اور سرپرستی کرے تاکہ نمائش کے سو فیصد نتائج حاصل کئے جا سکیں ۔انہوں نے تمام شرکاء پر زور دیا کہ نمائش میں معیاری اور جدید ڈیزائنوں سے مزین مصنوعات کو ڈسپلے کیا جائے ۔معیار اور ڈیزائن کے اعتبار سے ہماری مصنوعات دیگر ممالک کے مقابلے میں بہت بہتر ہیں تاہم انہیں مارکیٹنگ کی اشد ضرورت ہے اور کارپٹ کی عالمی نمائش اس کیلئے بہترین ذریعہ ثابت ہو سکتی ہے ۔اس موقع پر زیر ریٹنگ رجیم کے حوالے سے بھی تبادلہ خیال کیا گیا اور حکومت سے مطالبہ کیا گیا کہ برآمدی شعبوں کی تنظیموں سے رابطہ کرکے ان کے تحفظات دور کئے جائیں اورزیرو ریٹنگ رجیم کو ختم کرنے کے فیصلے کو واپس لیا جائے ۔
