ٹوکیو (این این آئی)فرانسیسی صدر ایمانوئل ماکروں نے کہا ہے کہ انہوں نے اپنے ایرانی ہم منصب کے ساتھ گفتگو میں انہیں عالمی طاقتوں کے ساتھ طے شدہ جوہری معاہدے سے نکلنے کے خلاف تنبیہ کر دی ہے۔غیرملکی خبررساں ادارے کے مطابق ماکروں نے ٹوکیو میں

صحافیوں کو بتایا کہ انہوں نے چند روز قبل ہونے والی گفتگو میں صدر حسن روحانی پر واضح کر دیا تھا کہ اگرایران 2015میں طے پانے والے جوہری معاہدے سے نکلا یا اس نے اس ڈیل کی خلاف ورزی کا کوئی اشارہ بھی دیا، تو یہ ایک غلطی ہو گی۔فرانسیسی صدر عمانوئل ماکروں نے اس عزم کا اعلان بھی کیا کہ وہ ایران اور امریکا کے درمیان فوجی جارحیت کے گریز کے لیے آئندہ دنوں کے دوران انتہائی ممکنہ کوششیں کریں گے۔فرانسیسی صدر کا کہنا تھا کہ وہ انتہائی کوششیں کریں گے تا کہ کوئی بھی فریق ایسے اقدام کا ارتکاب نہ کرے جس کی درستی ممکن نہ ہو۔ماکروں کے مطابق بنیادی بات یہ ہے کہ تمام لوگ کشیدگی کی شدت کم کرنے پر کام کریں۔فرانس کے صدر نے ایک بار پھر اس موقف کو دہرایا کہ ان کا ملک اس تزویراتی ہدف میں امریکا کا حامی ہے کہ ایران جوہری ہتھیار حاصل نہ کر سکے۔ انہوں نے واضح کیا کہ فرانسیسی حکام کو دستیاب معلومات کے مطابق 20 جون کو ایران کی جانب سے مار گرایا جانے والا امریکی ڈرون طیارہ بین الاقوامی فضائی حدود میں تھا۔ تہران یہ باور کراتا ہے کہ یہ طیارہ ایرانی اراضی کے اوپر تھا۔