کوئٹہ ( آن لائن )نیب بلوچستان نے سابق چیئرمین بی ڈی اے انور سادات غیر قانونی اثاثہ جات کیس میں اہم پیشرفت کرتے ہوئے سابق چیئرمین بی ڈی اے کے فرنٹ مین خادم حسین کو خضدار سے گرفتار کرلیا ہے،ملزم خادم حسین نیب کو کرپشن کے دو مختلف کیسز میں مطلوب تھا۔
ملزم نے سابق چیئرمین کے فرنٹ مین کے طور پر سادات انور کے پانچ سے زائد بینک اکائونٹس اور کروڑوں روپے مالیت کی متعدد جائیدادیں اپنے نام بنا رکھی تھیں۔نیب کی سابق چیئرمین بی ڈی اے کے خلاف تحقیقات کے مطابق ملزم خادم حسین کے بینک اکائونٹس میں سابق چیئرمین کی 25 کروڑ سے زائد رشوت کی رقم منتقل ہوئی ملزم نے سابق ایکسین محکمہ صنعت و حرفت عدیل انور کے اختیارات کا غلط استعمال کیس میں ٹھیکیدار عبدالصبور سے تقریبا ایک کروڑ رشوت کے طور پر بھی وصول کئے۔ خادم حسین نیب کو 2015سے مطلوب تھا جو سادات انور کے کہنے پر مفرور تھا، ملزم خادم حسین کی حالیہ گرفتاری سے سادات انور کی مزید غیر قانونی جائیدادوں کا سرا ملنے کا قوی امکان ہے ۔نیب نے ملزم کو خضدار سے گرفتار کرکے مجسٹریٹ سے چار روزہ ریمانڈ حاصل کر لیا ہے ، مزید تحقیقات جاری ہیں ۔ڈی جی نیب بلوچستان فرمان اللہ نے کرپشن کے خلاف زیرو ٹالرنس کی پالیسی کا اعادہ کرتے ہوئے مفرور ملزمان کی گرفتاری کے لئے کوششیں تیز کرنے کی ہدایات جاری کر دی ہیں ڈی جی نیب کے احکامات کی روشنی میں نیب انٹیلی جنس نے ملزمان کی گرفتاری کیلئے لائحہ عمل تیار کر لیا ہے۔
