لندن (آن لائن)مسلم لیگ(ن) کے صدر و قومی اسمبلی میں اپوزیشن لیڈر شہباز شریف نے کہا ہے کہ ملک کی معیشت تباہی کے دہانے پر پہنچ گئی ہے ،مہنگائی کے طوفان نے غریب عوام کا جینا محال کر دیا ہے ان حالات میں عوام سے دور نہیں رہ سکتے،ابھی علاج مکمل نہیں ہوا ،ڈاکٹروں کی اجازت کے بغیر وطن واپس جارہا ہوں ۔حکومت ججز کے خلاف ریفرنس فوری واپس لے۔
نجی ٹی وی سے گفتگو کرتے ہوئے شہباز شریف نے کہا ہے کہ وطن واپس پہنچ کر اسلام آباد میں پارٹی کے ذمہ داران سے مشاورت ہوگی، اپوزیشن جماعتوں کے اجلاس میں بجٹ اجلاس کے حوالے سے حکمت عملی طے کی جائے گی ۔انہوں نے کہا کہ آمدہ بجٹ میں نیازی حکومت سے خیر کی کوئی توقع نہیں ہے ان کی نااہلی کے باعث معیشت تباہی کے دہانے پر پہنچ گئی ہے ،بجلی اور گیس کی قیمتوں میں بے پناہ اضافہ کر کے عوام کا جینا محال کر دیا ہے ،ان کا کہنا تھا کہ تباہ شدہ معیشت کے ذمہ دار نیازی حکومت ہے ان میں کوئی صلاحیت نہیں ہے اور عوام کو ان کی اصلیت کا پتہ چل گیا ہے ،یہ عملی اقدامات کے بجائے صرف تقریروں میں عوام کو بے وقوف بنانے کی کوشش کرتے رہتے ہیں ۔ایک سوال کے جواب میں ان کا کہنا تھا کہ اس وقت ملک میں صرف مسلم لیگ (ن) کا احتساب ہو رہا ہے ،نیازی کے دونوں طرف کرپٹ لوگوں کا ہجوم ہے لیکن اس کو صرف نظر نہیں آرہا ہے،بابر اعوان نندی پور منصوبے میں پائوں سے لیکر سر کرپشن میں ڈوبا ہوا ہے لیکن اس سے کچھ نہیں پوچھا جارہا ،بلین ٹری منصوبہ اور پشاور میٹرو منصوبہ میں جہاں کئی اربوں روپے ضائع کر دیئے گئے اور منصوبہ آج تک مکمل نہیں ہوا لیکن ان سے کوئی پوچھنے والا نہیں ۔ایک سوال کے جواب میں اپوزیشن لیڈر شہباز شریف نے کہا ہے کہ حکومت کو فوری طور پر ججوں کے خلاف ریفرنس کو واپس لینا چاہیے ،عدلیہ کے خلاف سازش تیارکی جا رہی ہے ہم وکلاء تنظیموں کے ساتھ کھڑے ہیں۔
