لاہور(این این آئی)پنجاب اسمبلی میں قائد حزب اختلاف حمزہ شہباز نے کہا ہے کہ نوازشریف کی طبیعت ٹھیک نہیں لیکن اس کے باوجود انہیں جیل میں کسی قسم کی فوری طبی سہولت میسر نہیں،ذاتی معالج ڈاکٹر عدنان کو ایک ہفتے کے بعد ملنے کی اجازت دی گئی،
انجائنا کی مسلسل شکایت کرنے کے بعد بھی کریٹیکل کئیر کاکوئی ہنگامی انتظام کیا گیا اور نہ ہی کوئی معالج ہی موجود ہے۔ اپنے بیان میں انہوں نے کہا کہ عمران نیازی اگر میاں صاحب کو کچھ ہوا تو ذمہ دار آپ ہوں گے،فوری طور پر کریٹیکل میڈیکل کئیر یونٹ جیل بھیجا جائے۔ انہوں نے کہاکہ سیاسی آقاؤں کو خوش کرنے کے لئے اختیارات کا ناجائز استعمال کرنے والے قانون کی گرفت سے نہیں بچیں گے،عیدالفطر پر عام قیدیوں کی اہل خانہ سے ملاقات کا عام حق بھی نواز شریف کو نہ دینا منتقم مزاجی نہیں تو اور کیا ہے؟۔طے شدہ جمعرات کے دن بھی ملاقات پر پابندی کا مقصد نوازشریف اور اہل خانہ کو ذہنی اذیت پہنچانے کے سوا اورکچھ نہیں۔ انہوں نے کہا کہ عمران نیازی صاحب ذاتی انتقام پر اتر آئے ہیں۔ پوری قوم نوازشریف صاحب کی صحت کے لئے فکر مند ہے،ان کی صحت سے متعلق ملنے والی اطلاعات اچھی نہیں،نوازشریف آہنی اعصاب رکھنے والے قائد ہیں،سخت ترین حالات میں بھی ان کا حوصلہ غیرمتزلزل رہا ہے،فخر ہے کہ نوازشریف جیسا ایماندار، عالی حوصلہ اور ملک وقوم کا وفادار عظیم شخص میرا قائد ہے،انتقام کی زنجیریں ٹوٹنے کا وقت زیادہ دور نہیں۔ حمزہ شہباز نے کہا ہے کہ نوازشریف کی طبیعت ٹھیک نہیں لیکن اس کے باوجود انہیں جیل میں کسی قسم کی فوری طبی سہولت میسر نہیں،ذاتی معالج ڈاکٹر عدنان کو ایک ہفتے کے بعد ملنے کی اجازت دی گئی
