موسمیاتی تبدیلیوں کی وزیر زرتاج گل نے 27 فروری 2019ء کو سیکرٹری داخلہ اعظم سلیمان خان کو خط لکھ کر اپنی بہن شبنم گل کو نیکٹا میں ڈائریکٹرلگانے کی سفارش کی تھی‘ یہ خط لیک ہوا‘ وائرل ہوا اور آج وزیراعظم نے نوٹس لے لیا‘ کابینہ کے اجلاس میں وزیراعظم نے زرتاج گل کو ڈانٹ بھی پلائی اور یہ سفارش واپس لینے کا حکم بھی جاری کیا‘ وزیراعظم کا کہنا تھا نئے پاکستان میں اقرباء پروری کی کوئی گنجائش نہیں‘
وزیراعظم کا یہ فقرہ دل کو بظاہر اچھا لگتا ہے‘ سوشل میڈیا پر وزیراعظم کیلئے تالیاں بھی بجائی جا رہی ہیں لیکن سوال یہ ہے کیا یہ جسارت صرف زرتاج گل نے کی تھی‘ کیا وزیراعظم نے اپنے دوستوں کو دل کھول کر نہیں نوازا‘ زلفی بخاری کون ہیں اور ان کے پاس کیا مہارت ہے‘یہ وزیراعظم کے معاون خصوصی برائے سمندر پار پاکستانیز کیوں لگا دیئے گئے‘ صاحبزادہ جہانگیر کون ہیں اور یہ وزیراعظم کا معاون خصوصی برائے بیرونی سرمایہ کاری لگانے کی آفر کیوں کی گئی؟ عون چوہدری کو وزیر اعلی پنجاب کا مشیر کیوں بنایا گیا، نعیم الحق کو وزیراعظم کے معاون خصوصی کے عہدے پر کیوں لگایا گیا اور کیا ان کی واحد کوالیفکیشن وزیراعظم سے دوستی نہیں اور ان کو جن جن محکموں میں لگایا گیا یہ کبھی ان محکموں کے قریب سے بھی نہیں گزرے تھے‘ ہم اگر وزیراعظم کے بعد دیکھیں تو نعیم الحق نے اپنے بھتیجے کو ریجنل ڈائریکٹر لگا دیا‘ فواد چوہدری نے فیصل حسین کو ایڈیشنل ایڈووکیٹ جنرل پنجاب لگوا دیا، صوبائی وزیر زراعت نعمان لنگڑیال نے نوید بھنڈر کو اپنی ہی وزارت میں چیئرمین ایگریکلچر مارکیٹنگ ریگولیٹری اتھارٹی لگادیا‘ کیا یہ اقرباء پروری نہیں تھی اور اگر آج زرتاج گل کی بہن کا آرڈر ”ری ورس“ ہو رہا ہے تو کیا یہ سارے آرڈر بھی واپس نہیں ہونے چاہئیں‘کیا ریاست مدینہ میں میرا بھائی جائز اور تمہارا بھائی اقرباء پروری‘ کیا اس کی گنجائش موجود ہے‘ وزیراعظم کو اقرباء پروری کا یہ ڈرم بھی صاف کرنا پڑے گا۔ پاکستان مسلم لیگ ن نے تھوڑی سی خاموشی کے بعد نیب کے خلاف دوبارہ گولہ باری شروع کر دی‘ کیا وجہ ہو سکتی ہے اور موجودہ حکومت کا بڑا فیلیئر کیا ہے۔
