کراچی (این این آئی) کراچی کے ٹریول ایجنٹس کے فراڈ کی وجہ سے رمضان المبارک میں عمرہ کی سعادت حاصل کرنے کے لیے حجاز مقدس جانے والے سینکڑوں پاکستانی سعودی عرب میں رُل گئے۔ رمضان المبارک کے آخری عشرے میں عمرے کے لیے سعودی عرب جانے والے
پاکستانیوں نے پیکیج کے نام پر ٹریول ایجنٹس کو بھاری رقوم دے رکھی ہیں لیکن ان زائرین کو نہ تو وہاں ہوٹل کی سہولت میسر ہے اور نہ ہی آنے جانے کے لیے ٹرانسپورٹ کا مناسب انتظام ہے۔ ہوٹلوں میں جگہ نہ ہونے کی وجہ سے مکہ مکرمہ اور مدینہ منورہ میں سیکڑوں پاکستانی عمرہ زائرین سڑکوں اور فٹ پاتھوں پر رہنے پر مجبور ہوگئے۔ عمرہ زائرین جن میں خواتین اور بچوں کی بڑی تعداد بھی شامل ہے ٹریول ایجنٹس کو جھولیاں پھیلا پھیلا کر بددعائیں دے رہے ہیں۔ زائرین کو جن ہوٹلز کی بکنگ کا لیٹر دیا گیا ہے زائرین وہاں جاتے ہیں تو جواب ملتا ہے کہ جب کمرہ خالی ہوگا تو ملے گا، آپ باہر انتظار کریں۔ واضح رہے کہ ٹریول ایجنٹس نے رمضان کے آخری عشرے میں عمرہ پر بھیجنے کے لیے عام دنوں سے چار گنا زیادہ رقم وصول کی ہے اس کے باوجود انہیں سعودی عرب میں دھکے کھانے پڑ رہے ہیں، عمرہ زائرین نے حجاز مقدس سے بذریعہ فون اپنی شکایات درج کراتے ہوئے فراڈ میں ملوث ٹریول ایجنٹس کے خلاف سخت ایکشن لینے اور ان کے لائسنس منسوخ کرنے کا مطالبہ کیا ہے۔
