اسلام آباد (این این آئی)قومی اسمبلی اجلاس میں حکومت اور اپوزیشن کے ارکان کی جانب سے طنزیہ اور دلچسپ جملوں کا تبادلہ بھی ہوتا رہا۔پیر کو اجلاس کے دور ان سابق وزیر خارجہ خواجہ آصف نے اپنی تقریر میں افغان جہاد کو غلطی قرار دیا تو فواد چوہدری نے جملہ کسا کہ اس جہاد میں آپ بھی شریک تھے۔جوابا خواجہ آصف نے کہا ہاں افغان جہاد ہماری غلطی تھی مگر آپ بتائیں آپ آجکل کس منسٹری میں ہوتے ہیں؟ فواد چودھری نے تو ابھی جواب نہیں دیا تھا کہ لیگی رکن مرتضی جاوید عباسی نے کہاکہ یہ آجکل

جنتری بنا رہے ہیں۔ خواجہ آصف نے کہاکہ میرے منتخب بھائی کو ہٹا کر ان کی جگہ غیر منتخب میری سیالکوٹ کی ہمسائی کو مشیر اطلاعات لگا دیا گیا مگر فواد چودھری کی یہ صلاحیت ہے ان کو لہریں گننے پر بھی لگا دیں تو اچھا کام کرلیں گے۔ایک موقع پر جب خواجہ آصف نے کہاقومی حکومت میں وزیر اعظم عمران خان کی جگہ لینے کیلئے بھی کچھ لوگ تیار بیٹھے ہیں، اسپیکر صاحب آپ کو بھی معلوم ہے۔جس پر سپیکر مسکراتے ہوئے بولے مجھے کچھ معلوم نہیں۔ ان شگفتہ جملوں کے دوران ایوان میں قہقہے گونجتے رہے