لاہور(مانیٹرنگ ڈیسک) پاکستان تحریک انصاف کے رہنما اور سابق وزیر اطلاعات پنجاب فیاض الحسن چوہان نے ایک نجی ٹی وی چینل سے گفتگو کرتے ہوئے کہا کہ جس دن مریم نواز شرمیلی شرمیلی بلاول کے ساتھ بیٹھی تھیں نواز شریف کی عزت کا جنازہ اسی دن نکل گیا تھا، انہوں نے دوران پروگرام دعویٰ کیا کہ میں فرنٹ فٹ پہ کھیلتا ہوں اس لیے مخالفت ہوتی ہے۔

انہوں نے مریم نواز اور بلاول کو چیلنج دیتے ہوئے کہا کہ 45سے 50ڈگری میں شاہراہِ دستور پر کھڑے ہوکر دکھائیں اگر دونوں ایک گھنٹہ بھی یہ برداشت کر لیں تو جو چور کی سزا وہ میری سزا۔ سابق وزیراطلاعات پنجاب نے کہا کہ پیپلز پارٹی اور ن لیگ کے اکٹھے ہونے سے پیپلز پارٹی کو فائدہ ہوا ہے جبکہ ن لیگ کو اس کا نقصان پہنچا ہے، انہوں نے کہا کہ اکٹھا ہونے سے زرداری فائدے میں رہا اور ن لیگ کا جنازہ نکل گیا۔ فیاض الحسن چوہان نے کہا کہ باہر ووٹ کو عزت دو کا نعرہ لگایا جا رہاہے اور اندر منتیں کی جا رہی ہیں، انہوں نے کہا کہ مریم اور بلاول اپنے اپنے ابو کو بچانے کے لیے اکٹھے ہوئے ہیں، مولانا فضل الرحمان کے حوالے سے سوال کا جواب دیتے ہوئے فیاض الحسن چوہان نے کہا کہ آج کل وہ بے روزگار ہیں، وہ تین دفعہ تحریک کی کوشش کر چکے ہیں، انہوں نے کہا کہ آج وزیرستان میں سکون ہے تو اس کے پیچھے وردی ہے۔ پی ٹی ایم کے حوالے سے بات کرتے ہوئے انہوں نے کہا کہ وہ ڈرون حملوں پر خوش ہوتے ہیں۔ فیاض الحسن چوہان نے گفتگو کرتے ہوئے کہا کہ میاں نواز شریف اور مریم نواز میں فوج کے خلاف نفرت ہے اور یہ نفرت کبھی ختم نہیں ہو سکتی۔ انہوں نے دعویٰ کرتے ہوئے کہا کہ میں عید کے بعد واپس آ رہا ہوں، انہوں نے کہا کہ میرے خلاف سازش ہوئی لیکن سازشوں کا بتاؤں گا نہیں۔