اسلام آباد (این این آئی)سپریم کورٹ آف پاکستان نے بے نامی اکائونٹ کیس میں محمد نواز کیخلاف نیب کی اپیل مسترد کردی ۔ جمعہ کو سپریم کورٹ میں نیب کی جانب سے بے نامی اکاؤنٹ کیخلاف درخواست پر سماعت چیف جسٹس کی سربراہی میں تین رکنی بینچ نے کی۔ چیف جسٹس نے کہاکہ نیب نے اپنے ریفرنس میں لکھا کہ محمد نواز نے کوئی اکاؤنٹ نہیں کھولا۔چیف جسٹس نے کہاکہ
دو اکاؤنٹس محمد نواز کے بھائیوں کے تھے۔ ایڈیشنل پراسیکیوٹر نیب نے کہاکہ اکائونٹ میں18 لاکھ 90 ہزار کی رقم کیش جمع کرائی گئی۔ایڈیشنل پراسیکیوٹر نیب نے کہاکہ قومی خزانے کو نقصان پہنچایا گیا۔ چیف جسٹس نے کہاکہ دستاویزات میں کوئی شواہد نہیں جس سے معلوم ہو کہ محمد نواز کے اکاؤنٹ تھے یا اس نے قومی خزانے کو نقصان پہنچایا۔ایڈیشنل نیب پراسیکیوٹر نے کہاکہ ایک ڈیل کرتے ہیں میں پیرا گراف پڑھتا ہوں اگر جرم ثابت نہ ہوا تو میں چپ کر جاؤں گا۔ چیف جسٹس آصف سعید کھوسہ نے کہاکہ نیب ڈیلیں کرتا ہوگا ہم ڈیلیں نہیں فیصلے کرتے ہیں۔دوران سماعت چیف جسٹس نے ریمارکس دیئے کہ اگلے ہفتے سے انشاء اللہ ای ویڈیو لنک سسٹم شروع ہو جائیگا،اکیسویں صدی شروع ہو جائیگی۔ چیف جسٹس نے کہاکہ کراچی اور لاہور سے وکلاء حضرات ویڈیو لنک کے ذریعے پیش ہوں گے،انشاء اللہ سوموار کو ویڈیو لنک کے ذریعے ہم فیصلے کریں گے۔ بعد ازاں عدالت نے ہائیکورٹ کا فیصلہ برقرار رکھتے ہوئے نیب کی درخواست مسترد کر دی۔عدالت نے کہاکہ ٹرائل کورٹ نے محمد نواز کو سات سال کی سزا سنائی تھی، ہائیکورٹ نے شواہد کو مدنظر رکھتے ہوئے فیصلہ کیا۔
