اسلام آباد (این این آئی)کابینہ کی اقتصادی رابطہ کمیٹی نے پٹرولیم مصنوعات کی قیمتوں میں اضافہ کی منظوری دیدی ہے، پٹرول 9روپے 35پیسے، ہائی اسپیڈ ڈیزل 4 روپے 89 پیسے، لائٹ ڈیزل 6 روپے 40 پیسے، مٹی کا تیل 7 روپے 46 پیسے فی لٹر مہنگا کیا جائیگا،پٹرولیم مصنوعات کی قیمتوں میں اضافہ کا اطلاق منگل کو کابینہ اجلاس میں منظوری کے بعد ہوگا۔ میڈیا رپورٹ کے مطابق مشیر خزانہ عبد الحفیظ شیخ کی زیر صدارت اقتصادی رابطہ کمیٹی کااجلاس ہوا

جس میں پٹرولیم مصنوعات کی قیمتوں میں اضافہ کی منظوری دی گئی۔ذرائع کے مطابق ای سی سی نے9روپے 35پیسے فی لیٹر مہنگا کر نے کی منظوری دی،حکومت پٹرول کی مد میں پانچ ارب روپے کا بوجھ برداشت کریگی۔ذرائع نے بتایاکہ ای سی سی نے ہائی سپیڈ ڈیزل کی قیمت میں فی لیٹر 4 روپے 89پیسے مہنگاکرنے کی منظوری دی۔ذرائع کے مطابق لائٹ ڈیزل آئل کی قیمت 6روپے 40پیسے فی لیٹر بڑھانے کی منظوری دی گئی، مٹی کا تیل 7 روپے 46 پیسے فی لٹر مہنگا کیا جائیگا۔نجی ٹی وی کے مطابق اجلاس کے دور ان ای سی سی نے وزارتوں کی سپلیمنٹری گرانٹس کی بھی منظوری دیدی۔ای سی سی نے پنجاب رینجرز کے لیے ضمنی گرانٹس کی سمری منظور کر لی،وزارت داخلہ کے لیے 3 کروڑ 72 لاکھ روپے کے اضافی فنڈز مختص کرنے کی منظوری دی گئی۔اجلاس میں ایکسپلوزوز ڈیپارٹمنٹ کیلئے تکنیکی ضمنی گرانٹ کی سمری بھی منظور کرلی گئی،نیشنل سیونگز آرگنائزیشن کیلئے 54 کروڑ روپے کی ضمنی گرانٹ منظورکرلی گئی،ملک میں ایک ہزار انڈسٹریل اسٹچنگ یونٹس کے لیے ضمنی گرانٹس منظور کرلی گئی۔ذرائع کے مطابق تھل ایسٹ، بھمبرا، تھل ویسٹ فیلڈز سے ایس ایس جی سی کو گیس فراہمی کی سمری منظور کرلی گئی،پٹرولیم مصنوعات کی قیمتوں میں اضافہ کا اطلاق منگل کو کابینہ اجلاس میں منظوری کے بعد ہوگا۔