اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے تھانہ سٹی حافظ آباد پر پی ٹی آئی ایم این اے شوکت بھٹی، ان کے نااہل والد اور حامیوں کے حملہ کی مذمت کرتے ہوئے کہاہے کہ حافظ آباد میں حکمران جماعت کے رہنمائوں اور حمایتوں کا تھانے پر حملہ نیا پاکستان ہے۔ ایک بیان میں انہوں نے کہاکہ پرانے پاکستان میں عمران صاحب پارلیمان اور پولیس والوں پر حملے کرتے تھے ۔ انہوں نے کہاکہ نئے پاکستان میں عمران صاحب کے ایم این اے اور حامی
تھانوں پر حملے کررہے ہیں۔ انہوں نے کہاکہ نئے پاکستان میں محافظ محفوظ نہیں ، تو لوگوں کا اللہ ہی حافظ ہے ۔ انہوں نے کہاکہ پرانے پاکستان میں عمران صاحب کنٹینر سے سیاسی مخالفین اور پولیس والوں کو گالیاں دیتے تھے ۔ انہوں نے کہاکہ نئے پاکستان میں ان کے ایم این اے اور حامی تھانوں میں گھس کر پولیس والوں کو گالیاں دے رہے ہیں ۔ انہوں نے کہاکہ کنٹینر پر کھڑے ہوکر پولیس والوں کے سر پھاڑنے اور ان پر حملوں کی روایت اب تھانوں پر حملوں تک پہنچ گئی ہے۔
