راولپنڈی (این این آئی) پاکستان مسلم لیگ (ن)کے رہنما حنیف عباسی کے اہلخانہ نے محمد حنیف عباسی کی رہائی کے فیصلے پر کہا ہے کہ فیصلے سے ثابت ہو گیا گوگل سرچ کے ذریعہ دیا گیا فیصلہ غلط تھا،ہمیں طویل عرصہ ذہنی اذیت سے گزرنا پڑا ، فیصلے پر اللہ تعالی کا شکر ادا کرتے ہیں ،کل جمعہ کو مچلکے جمع ہو نگے جس کے بعد حنیف عبا سی کو جیل سے رہائی مل سکے گی ۔
جمعرات کو سابق رکن قومی اسمبلی حنیف عباسی کی رہائی کے فیصلے پر اہل خانہ نے کہاکہ فیصلے سے ثابت ہو گیا کہ گوگل سرچ کے ذریعہ دیا گیا فیصلہ غلط تھا ۔بھائی باسط عباسی نے کہاکہ فیصلے پر اللہ تعالی کا شکر ادا کرتے ہیں،ہمیں طویل عرصہ ذہنی اذیت سے گزرنا پڑا ۔انہوں نے کہاکہ مچلکےکل جمعہ کے روز جمع ہو نگے جس کے بعد حنیف عبا سی کو جیل سے رہائی مل سکے گی۔حنیف عبا سی کا رہائی کے بعد راولپنڈی آمد سے قبل لیگی قیادت سے بھی ملاقات کا امکان ہے ،ذرائع کے مطابق راولپنڈی پہنچنے پر حنیف عبا سی کے شاندار استقبال کا انتظام بھی ہو گا۔یاد رہے کہ سابق رکن اسمبلی حنیف عبا سی کو جنرل الیکشن سے چار روز قبل عمر قید اور دس لاکھ روپے جرمانے کی سزا سنائی گئی تھی ،اے این ایف نے حنیف عبا سی کے خلاف 500کلو گرام ایفیڈرین کوٹہ کے غیرقانونی استعمال کا مقدمہ درج کیا تھا ۔حنیف عبا سی حالیہ انتخابات میں این اے 60 سے ن لیگ کے امیدوار تھے ۔21 جولائی کو ہائی کورٹ کی ڈائریکشن کی روشنی میں ٹرائل کورٹ کے جج سردار محمد اکرم خان نے فیصلہ سنا یا ۔فیصلے کے نتیجے میں حنیف عبا سی الیکشن سے باہر ہوگئے تھے ۔حنیف عبا سی نے سزا کیخلاف راولپنڈی کے بعد لاہور ہائی کورٹ لاہور میں اپیل دائر کر رکھی تھی ۔ہائی کورٹ راولپنڈی میں دائر اپیل پر بار بار بنچ ٹوٹنے کے باعث سماعت نہ ہو سکی تھی ۔
