متحدہ عرب امارات کا سفر کرنے والے کچھ مسافر اپنے ساتھ ایسی اشیاءلے جانے کی غلطی کر بیٹھتے ہیں کہ جن کی وجہ سے وہ دوبارہ کبھی اس ملک میں داخل نہیں ہوسکتے۔ دبئی کسٹمز کے سینئر انسپیکشن آفیسر حسن ابراہیم نے ”ایمریٹس 247“ کو بتایا کہ ان کا محکمہ کالے جادو اور عملیات میں ملوث افراد پر خصوصی نظر رکھتا ہے اور کسی مسافر کے سامان سے کوئی بھی ایسی چیز مل جائے کہ جس کا تعلق جادو ٹونے کے ساتھ بنتا ہو تو وہ مسافر ساری عمر کے لئے متحدہ عرب امارات میں داخل ہونے کے حق سے محروم ہوجاتا ہے۔ انہوں نے بتایا کہ ہر ہفتے دو یا تین مشکوک مسافر پکڑے جاتے ہیں جن کے قبضے سے عجیب و غریب اشیاءبرآمد ہوتی ہیں۔ ان اشیاءمیں زعفران، روشنائی یا خون سے لکھے ہوئے تعویزات، جادو کے متعلق کتب، جانوروں کی کھال اور ہڈیاں، مردہ جانور، خون، پتے، بخور (ایک قسم کی خوشبو)، انسانوں اورجانوروں کے بال اور جانوروں کے اعضا خصوصاً قابل ذکر ہیں۔ کسٹمز افسران کا کہنا ہے کہ جادو ٹونا کرنے والے سادہ لوح عوام کو لوٹنے کی نیت سے آتے ہیں اور ان کا تعلق عموماً ایشیائی یا افریقی ممالک سے ہوتا ہے۔