لاہور(این این آئی)کراچی اور لاہور سے تعلق رکھنے والی شوبز شخصیات نے اداکارہ مہوش حیات کی ستارہ امتیاز کیلئے نامزدگی پر حیرانی کا اظہار کرتے ہوئے کہا کہ منظور نظر لوگوں کو اس طرح نوازکر قومی سطح کے ایوارڈز کو بے وقعت نہ کیا جائے۔ فنکاروں نے اپنے رد عمل میں کہا کہ ہم یہ پوچھنے میں حق بجانب ہیں کہ مہوش حیات کی فن اور ادب کیلئے کیا خدمات ہیں جس پر انہیں ایوارڈ کیلئے
نامزد کیا گیا ہے ۔انہوں نے کہا کہ اس سے قبل بھی میرا کو ایوارڈ کے لئے نامزد کیا گیا جس پر تمام حلقوں کی جانب سے تنقید کی گئی ۔ انہوں نے کہا کہ فن کے شعبے میں گراں قدر خدمات سر انجام دینے والوں کو نظر انداز کر کے سفارشی اور منظور نظر لوگوں کو نوازنے سے قومی سطح کے حامل ایوارڈ کی اہمیت کم اور انہیں بے وقعت کیا جارہا ہے جو نا انصافی اور قابل مذمت ہے ۔
