کراچی (این این آئی)کراچی پولیس نے شہر کے مضافاتی علاقے مواچ گوٹھ سے چند روز قبل ملنے والی ماڈل کی لاش کے کیس میں نجی کلینک کی نرس اور اس کی اسسٹنٹ کو مبینہ قتل کے الزام میں گرفتار کر لیا۔کیماڑی کی ایس پی ارم اعوان نے بتایا کہ نجی کلینک میں رباب نامی ماڈل کی موت اسقاطِ حمل کے دوران غیرپیشہ وارانہ طرز عمل کے باعث ہوئی۔انہوں نے بتایا کہ نجی کلینک میں رباب کا اسقاطِ حمل کرنے والی خاتون نرس اور اس کی اسسٹنٹ کو گرفتار کرلیا۔ایس پی کے مطابق پیشے کے اعتبار سے رباب ماڈل تھی۔

انہوں نے کہا کہ ملزمان رباب کی لاش شہر سے دور ایک قبرستان میں پھینک کر فرار ہوگئے جو مواچ گوٹھ پولیس کی حدود میں واقع ہے۔پولیس افسر نے دعویٰ کیا کہ ابتدائی تحقیقات میں یہ بات سامنے آئی کہ اسقاطِ حمل کے دوران غلط انجکشن لگنے سے رباب کی موت ہوئی۔کیماڑی ایس پی ارم اعوان نے بتایا کہ رباب کے قتل میں ان کے دو مشتبہ دوستوں کے ملوث ہونے پر شبہ ہے جو اسلام آباد فرار ہو چکے ہیں۔انہوں نے بتایا کہ مقتولہ کے بوائے فرینڈ کی گرفتاری کیلئے پولیس کی ٹیم اسلام آباد بھیجی جائیگی۔