لاہور(این این آئی) صوبائی وزیر برائے اطلاعات و ثقافت فیاض الحسن چوہان نے کہا ہے کہ نواز شریف کو سیاسی ذلت اور تنہائی کا شکار کرنے میں بنیادی کردار پرویز رشید اور مریم صفدر کا ہے- ان کے مشوروں پر عمل کر کے ہی نواز شریف اس حال کو پہنچے ہیں۔ انہوں نے ہمیشہ اپنے ٹھنڈیٹھنڈے لہجے میں عمران خان صاحب کے لئے گرم گرم بولا ہے۔ پرویز رشید عمران خان صاحب سے بغض، عناد اور حسد کے معراج اولی پر فائز ہیں۔
عمران خان کے امن کے لیے کئے گئے اقدامات کی وجہ سے اب بھارت میں بھی مودی پر تنقید کی جا رہی ہے۔ان خیالات کا اظہار صوبائی وزیر اطلاعات و ثقافت نے پرویز رشید کی وزیر اعظم عمران خان پر تنقید پر ردعمل دیتے ہوئے کیا۔ انہوں نے کہا کہ پرویز رشید وزیر اعظم عمران خان کی مخالفت میں اپنے حواس کھو بیٹھے ہیں۔ عمران خان کے خلاف عناد اور بغض ان میں کوٹ کوٹ کر بھرا ہوا ہے۔ آج جبکہ عالمی رہنما اور عالمی میڈیا ہر فورم پر وزیر اعظم عمران خان کے تدبر اور امن پسندی پر ان کی تعریف کر رہا ہے وہاں پرویز رشید جیسے لوگ اب بھی ان پر تنقید کرنے سے باز نہیں آرہے۔ آج جب بھارت کی تیس کروڑ عوام اس مسئلے پر تقسیم ہو چکی ہے۔ آدھی عوام مودی کو گالیاں دیرہی ہے۔ مودی کے پتلے جلائے جا رہے ہیں۔ بھارتی میڈیا مسلسل اپنی حکومت پر الزام تراشیاں کر رہا ہے۔ بھارت کی فوج کے حاضر سروس افسران اپنی حکومت پر تنقید کے تیر برسا رہے ہیں۔ پرویز رشید صاحب کو یہ کون سمجھائے کہ یہ سب ہمارے کپتان عمران خان کی امن کے لئے کئے گئے اقدامات کا نتیجہ ہیں۔ جناب پرویز رشید صاحب ان نازک حالات میں سیاست سے باز رہیں اور عمران خان صاحب کے اقدامات پر تنقید سے گریز کریں۔بعد ازاں پاک بھارت کشیدگی پر فیاض الحسن چوہان نے کہا کہ پاک سرزمین کے محافظوں کو میرا سلام، وطن کی خاطر جان قربان کرنے والوں جوانوں کو میں سیلوٹ کرتا ہوں۔مودی کو اپنی فوج اور میڈیا سمیت شرم سے ڈوب مرنا چاہئے۔
ہم نے ان کا زندہ پائلٹ بھیجا اور انہوں نے ہمارے شہری کی میت بھیجی۔مودی میں زرا سی بھی شرم باقی ہے تو سیاست چھوڑ دے۔مودی کو میرا مشورہ ہے کہ واپس گجرات جا کر ریلوے سٹیشن پر چائے کا ڈھابہ لگا لے۔بھارت یاد رکھے کہ وزیر اعظم عمران خان اور پاک فوج کی قیادت میں تمام پاکستانی متحد ہیں۔ہم امن کے خواہاں ہیں لیکن کسی بھی جارحیت کے جواب میں منہ توڑ جواب دیں گے۔مودی کان کھول کر سن لو یہ پاکستان ہے جان اپنی اور جان تو سب کو پیاری ہے۔بھارت کی صرف غلط فہمی ہے کہ پاکستان کو شکست دے سکتاہے۔بھارت کی اپنی بہادری صرف فلموں تک محدود ہے، حقیقت میں ابھینندن جیسا حال ہوتا ہے۔