لاہور(مانیٹرنگ ڈیسک) وزیراعظم عمران خان نے کہا ہے کہ ہماری اولین ترجیح چھوٹے کسان کے مفاد کا تحفظ ہے، زراعت ہماری معیشت کے لیے بہت اہم حیثیت رکھتی ہے۔ تفصیلات کے مطابق وزیراعظم عمران خان کی زیر صدارت 2019 کے لیے گندم کی خریداری سے متعلق اجلاس ہوا۔جس میں وفاقی وزیر نیشنل فوڈ سیکیورٹی محبوب سلطان، وزیر آبپاشی محسن چوہدری، وزیراعلیٰ پنجاب عثمان بزدار
ہاشم جواں بخت، نعمان لنگڑیال، سمیع اللہ چوہدری ودیگر نے شرکت کی۔ وزیراعظم عمران خان نے کہا کہ اللہ کے کرم سے اس بار بہت اچھی بارشیں ہوئی ہیں، بارشوں کی وجہ سے اچھی گندم کی فصل کی امید ہے، گندم کی خریداری کا عمل شفاف ہونا چاہئے۔ وزیراعظم نے کہا کہ معیاری، جدید پیداواری ٹیکنالوجی کے استعمال کا پلان مرتب کیا جائے، پبلک پرائیویٹ پارٹنر شپ کے طریقہ کو زیر غور لایا جائے۔ انہوں نے کہا کہ گندم کی اسٹوریج کے لیے جدید انفرا اسٹرکچر کے لیے منصوبہ بندی کی جائے۔ دوسری جانب قومی زرعی ایمرجنسی پروگرام سے متعلق وزیراعلیٰ آفس لاہور میں اجلاس ہوا جس میں وفاقی وزیر برائے نیشنل فوڈ سیکیورٹی محبوب سلطان، وزیراعلیٰ پنجاب ودیگر نے شرکت کی۔ وزیراعظم کو 6 ماہ میں زراعت میں بہتری کے لیے اقدامات سے متعلق آگاہ کیا گیا، زراعت میں مزید بہتری کے لیے منصوبہ بندی سے بھی آگاہ کیا گیا۔ وزیراعظم عمران خان نے کہا کہ چھوٹے کاشتکاروں کو سہولیات دے کر زراعت میں بہتری لاسکتے ہیں، زراعت میں جدت لانے کے لیے چین سے سیکھنا چاہئے، ہمیں کسانوں کو کاشتکاری کے نئے طریقوں سے آشنا کرانا ہوگا۔
