دبئی (مانیٹرنگ ڈیسک) وزیراعظم عمران خان آج متحدہ عرب امارات کے دورے میں عالمی مالیاتی ادارے آئی ایم ایف کی چیف کرسٹینا لگارڈ سے ملاقات کریں گے۔ تفصیلات کے مطابق وزیر اعظم کے دورہ ٔ یو اے ای کے موقع پر یہ اہم ملاقات ہوگی۔ گزشتہ روز فواد چوہدری نے ایک انٹرویو میں تصدیق کرتے ہوئے کہا تھا کہ ملاقات میں آئی ایم ایف کو پاکستان کے موقف سے آگاہ کیا جائےگا۔
اس موقع پر وزیر اطلاعات اور وزیر خزانہ بھی عمران خان کے ہمراہ موجود ہوں گے۔ فواد چوہدری نے انٹرویو میں یہ بھی واضح کیا کہ مسئلہ آئی ایم ایف نہیں، مانیٹری فنڈ کی شرائط کا ہے، ہم ایسی شرائط نہیں چاہتے کہ جن سے ترقی کا عمل متاثر ہو۔ایسی ڈیل چاہتے ہیں جس سے مختصر اہداف حاصل کرنے میں مدد ملے۔ وزیراعظم ہاؤس سے گزشتہ روز جاری کردہ اعلامیے میں کہا گیا تھا کہ وزیرِ اعظم عمران خان آج دبئی کے ایک روزہ دورے پر جائیں گے ،جہاں وہ ورلڈ گورنمنٹ سمٹ سے خطاب کریں گے۔ کہا گیا ہے کہ وہ یہ دورہ شیخ محمد بن راشد المکتوم کی دعوت پر دورہ کر رہے ہیں۔ اس موقع پر وزیرِ اعظم عمران خان متحدہ عرب امارات کی قیادت کے ساتھ ملاقاتیں کریں گے۔ وزیرِ اعظم عالمی حکومتی سربراہی اجلاس کے عالمی مقررین میں شامل ہیں۔ وزیرِ اعظم عمران خان نالج اکانومی، مصنوعی ذہانت اور مستقبل میں ترقی کے مواقع کے موضوع پر گفتگو کریں گے۔دبئی میں ہونے والے اس سربراہی اجلاس سے خطاب میں وہ خوش حال اور مضبوط پاکستان کا وژن اجاگر کریں گے۔
