برلن(این این آئی) پھل اور سبزیوں سے متعلق برلن میں جاری بین الاقوامی نمائش ’’فروٹ لاجسٹکا ‘‘میں شریک پاکستانی کمپنیوں کو غیرملکی خریداروں کی جانب سے کروڑوں روپے کے آرڈر ملنا شروع ہو گئے۔تفصیلات کے مطابق پاکستان کی معیشت کی بہتری اور برآمدات میں اضافہ کے لیے حکومتی کوششوں کے فوائد سامنے آنا شروع ہوگئے ہیں اور جرمنی کے شہر برلن میں جاری ’’فروٹ لاجسٹکا نمائش ‘‘میں پاکستانی کمپنیوں کا قومی پویلین کو بھرپور پذیرائی ملی ہے۔ فروٹ ایکسپورٹرز ایسوسی ایشن کے
سرپرست وحید احمد کا کہنا ہے کہ فروٹ لاجسٹکا نمائش میں پاکستان سے 6 کمپنیاں اور 25 پاکستانی ایکسپورٹ کمپنیوں کے نمائندے بھی شریک ہیں۔فروٹ لاجسٹکا نمائش میں پاکستان فروٹ ایکسپورٹرز کو پہلے دن 15لاکھ ڈالر مالیت کے برآمدی آرڈرز ملے ہیں جو بڑی کامیابی ہے ۔وحید احمد کے مطابق نمائش میں شریک غیرملکیوں کی جانب سے پاکستانی کینو، کھجور، کھجوروں کی ویلیو ایڈڈ مصنوعات، تازہ سبزیاں، آم اور امرود کا گودا اور سیب کے شیرے میں بھر پور دلچسپی کا اظہار کیا گیاہے ۔
